Зеќири: Јас и семејството сега сме живи и здрави и сме си дома уште посилни од претходно

Потпретседателот на СДСМ Мухамед Зеќири преку Фејсбук објави дека тој и семејството го победиле коронавирусот и дека сега се дома. Зеќири и семејството поради коронавирусот беа хоспитализирани на Инфективната клиника. Тој им се заблагодари на сите што го поддржале во време на болеста.

– Од срце сакам да се заблагодарам на секој од вас што бевте со нас во најтешките времиња. Вие сте нашата втора фамилија. Посебно се заблагодарувам на докторите и медицинскиот персонал од Клиниката за инфективни болести и фебрилни состојби.

Најдлабока благодарност до оние кои се жртвуваат и продолжуваат тоа да го прават секој ден: доктор Илир, доктор Милена, доктор Фадил, доктор Ана од педијатрија, останатиот неуморен тим: Рејхан, Весна, Елена, Кики, Сухејла, Фисник, Изабела, Нуредин, Велимир, Снеже, Марина и многу, многу други кои 24 часа се во служба на пациентите сместени на инфективната клиника.

На оние кои и натаму мислат дека вирусот не постои и сѐ уште имаат несериозен пристап кон ковид-19 сакам да им порачам дека е крајно време да се освестат! Само со сериозен пристап кон алармантната ситуација низ која поминуваме како општество, со свест и совест, може да се спасат себе си, блиските и други недолжни луѓе!

Искрено посакувам ниту еден од вас да не мора да помине низ тоа што го поминав јас со моето семејство. Тоа не би му го посакал ниту на мојот најголем непријател!

А, на душегрижниците кои на мене и мојата фамилија ни посакуваа фатален крај ќе им пожелам Господ барем еднаш во нивниот живот да им даде да се почувствуваат како човек.

Господ е голем, благодарение на Него Алахмдулилах јас и мојата фамилија сега сме живи и здрави и сме си дома – сите заедно и уште посилни од претходно, напиша Зеќири.