Здравствената агенција на ЕУ почнува со проценка на вакцината „Новавакс“

Европската агенција за лекови (ЕМА) денеска соопшти дека ја почнала процедурата за проценка на вакцината против коронавирусот што ја разви американскиот производител на лекови „Новавакс“.

Врз основа на првичните резултати од лабораториските тестови и клиничките студии, ЕМА ја почна својата постапка за проценка, се вели во соопштението. Тоа значи дека податоците и резултатите од студиите се проценуваат пред да биде поднесено официјално барање за пуштање на пазарот, со што се скратува процесот.

Ако експертите за ЕМА, по прегледот на податоците и откако ќе биде поднесена официјално барање, одлучат да ја препорачаат вакцината, Комисијата на ЕУ ќе треба да одлучи дали ќе ја одобри.

Клиничките испитувања на вакцината произведена од Новавакс покажаа дека е 89-проценти ефикасна во заштитата од коронавирусот, но е помалку ефикасна во спречувањето на мутацијата откриена во Јужна Африка.

Доколку биде одобрена, таа ќе се приклучи на трите вакцини – на „АстраЗенека“, „Фајзер-Бионтек“ и „Модерна“ – кои се одобрени во Унијата.