ЗАТКУЛИСНИ ИГРИ И ПСИХОЛОШКИ ТАКТИКИ ЗА СЛАБЕЕЊЕ НА ЗАПАДОТ Зошто Путин негира дека разговарал со Трамп по телефон?
Политичкиот аналитичар, Александар Дубови, смета дека Кремљ се обидува да внесе сомнеж во трансатлантската заедница и дека руската стратегија за психолошка војна се фокусира на всадување страв, несигурност и недоверба, особено меѓу сојузниците.
Вечерта на 10 ноември, Вашингтон пост објави дека новоизбраниот претседател на САД, Доналд Трамп, имал телефонски разговор со рускиот претседател Владимир Путин на 7 ноември. Разговорот наводно бил фокусиран на мирот во Европа, при што Трамп изразил интерес за понатамошни дискусии за решавање на конфликтот во Украина.
Наводно, Трамп експлицитно го предупредил Путин за опасноста од ескалација на конфликтот во Украина, нагласувајќи го значителнотото присуство на американските воени сили во Европа.
Сепак, еден ден по извештајот, портпаролот на Кремљ, Дмитриј Песков, ги отфрли сите гласини за телефонски разговор меѓу Трамп и Путин како „чиста фикција“ и „лажни вести“.
– Ова е особено жив пример за квалитетот на информациите објавени деновиве, дури и во доста реномирани публикации. Тоа е апсолутно неточно. Тоа е чиста фикција, едноставно лажни вести – нагласи тој на брифингот за медиумите.
Но, кој ја кажува вистината?
Политичкиот аналитичар, Александар Дубови, објаснува дека на крајот на краиштата, и Трамп и Путин се запознаени со политичката алатка на измамата.
– Како што австрискиот пратеник во Европскиот парламент од либералната партија НЕОС, Хелмут Брандштатер, соодветно рече: „Не сум сигурен кому помалку да верувам…“ – додава Дубови.
Јасно е дека Трамп иницирал разговор со Путин и дека доказите на Вашингтон пост потекнуваат од тимот на Трамп, анализира Дубови, објави Москов тајмс.
– Вреди да се одбележи и тоа што приказната ја напиша еден весник кој се воздржуваше да поддржи претседателски кандидат за првпат по децении. Друг показател дека повикот се случил е неодамнешната дискусија меѓу украинскиот претседател Володимир Зеленски, Доналд Трамп и Илон Маск. Ова укажува на релативно мала веројатност за намерна измама од страна на Трамп – појаснува Дубови.
Во исто време, вели тој, ова би било далеку од тоа дека портпаролот на Кремљ, Дмитриј Песков, намерно ја искривува реалноста или негира настани што навистина се случиле.
Зошто Кремљ мора да негира каква било размена со идниот претседател на САД?
Дубови наведува дека се наметнуваат повеќе прашања поврзани со оваа тема.
– Дали Москва има за цел да избегне пречекорување на дипломатските протоколи или непотребно да го засрами претседателот Џо Бајден? Ако е така, тогаш зошто Кремљ едноставно не се воздржа од коментари? Зошто Кремљ, всушност, индиректно би го обвинил идниот претседател на САД дека лаже пред очите на светската јавност? Или сето ова е дел од таен, заткулисен договор меѓу Вашингтон и Москва? Ова се секако валидни прашања. Но, во моментов, се чини дека нема јасни одговори – додава Дубови.
Меѓутоа, подеднакво валидно е и друго прашање, вели тој, што потенцијално може да доведе до објаснување.
– Зошто руската државна телевизија прикажува полуголи фотографии од сопругата на Трамп, Меланија, за време на ударниот термин, до радосни коментари од двајца водечки пропагандисти? Овој провокативен приказ е уште еден елемент на руската преговарачка стратегија: сигнализирање подготвеност за разговор без никаква намера за компромис, создавање конфузија, непокажување слабост, проектирање сила, понижување на преговарачките партнери и обвинување други за неуспехот на разговорите – потенцира Дубови.
Сепак, додава аналитичарот, Кремљ со ова го одвлекува вниманието, па затоа е важно да не се земе сето тоа здраво за готово.
– Останува суштинското прашање: зошто Путин навистина би бил подготвен да направи какви било отстапки во овој момент? Досега никој не можеше да даде веродостоен одговор на тоа – вели тој.
Две причини за „подготвеноста на Русија да се вклучи во дијалог“?
Според Дубови, сепак, постојат најмалку две веродостојни причини за божемната подготвеност на Русија да се вклучи во дијалог.
– Првата е поврзана со прашањето за статусот, кој долгогодишниот лидер на Русија постојано го споменуваше во последните неколку недели, вклучително и во интервјуто со новинарот на Би-Би-Си, Стив Розенберг. Кремљ смета дека дијалогот на рамноправна основа со САД е вреден сам по себе. Москва е фиксирана на идејата дека Русија треба да застане како рамноправен (или речиси рамноправен) партнер со единствената друга глобална сила, САД, во одредувањето на судбините на светот. Во овој контекст, вистинските исходи од таквите дискусии се споредни на крајот на краиштата. За Русија, самиот пат кон тоа е награда сама по себе – објаснува експертот за геополитика.
Второто објаснување, вели Дубови, е поврзано со тактичката измама на рускиот режим.
– Москва ја гледа војната во Украина како продолжение на конвенционалната политика. Така, Кремљ користи низа политички, дипломатски и пропагандистички мерки заедно со воените дејства во конфликтот. Иако овој воен аспект е важен за Русија, тој не е одлучувачки за исходот на војната. За Кремљ, слабеењето на врските меѓу Украина и Западот е централно за успехот на Москва. Целта е да се постигне постепено поткопување на кохезијата на западниот сојуз и олабавување на врските на трансатлантските односи како целина – додава аналитичарот.
Со инструментализирање на дипломатските (или недипломатските) маневри на Трамп, вели Дубови, Москва има за цел да сее недоверба меѓу западните сојузници. Негирањето дури и на постоењето на телефонски повик, додава аналитичарот, ја претставува администрацијата на САД како несигурна во очите на глобалната јавност и, што е најважно, во очите на нејзините сојузници неколку недели пред тој да ја преземе функцијата.
Измешани сигнали, трикови и психолошка војна
Дубови објаснува дека Кремљ испраќа измешани сигнали за да го засили овој ефект: од една страна, укажувајќи на подготвеност за разговори, додека, пак, од друга страна, потврдувајќи дека не може да преговара за своите позиции.
– Портпаролот на Кремљ, Песков, само неколку дена по изборната победа на Трамп изјави дека иако Путин е отворен за разговори со Трамп во врска со Украина, воените цели на Русија ќе останат непроменети. Песков нагласи дека рускиот претседател ниеднаш не сугерирал дека целите на војната може да бидат изменети – објаснува експертот за геополитика.
Дубови смета дека Кремљ намерно се обидува да внесе сомнеж во трансатлантската заедница. Руската стратегија за психолошка војна се фокусира на всадување страв, несигурност и недоверба, особено меѓу сојузниците според него. На крајот на краиштата, вели тој, Путин не би сакал ништо повеќе освен, преку меѓусебно сомневање, да го турне трансатлантскиот сојуз до работ на колапс.