Заразено дете со ковид-19 во струмичка градинка

Денес е регистриран случај на заразено дете од струмичка градинка, додека во последните денови расте бројот на заразени во овој град од сите возрасти.

Детето е од еден од клоновите на струмичката градинка „Детска радост“, а се заразило од член на семејството. Тоа не било носено во градинката од понеделникот.

– Нема простор за паника, но има простор за подигање на алармот, бидејќи Струмица долго време беше една од општините која имаше релативно мал број позитивни пациенти и можеби тоа даде една комоција за полежерно однесување и непочитување на мерките за заштита – оцени градоначалникот на Струмица, Коста Јаневски по денешниот координативен состанок, на кој учествуваа претставници на повеќе државни органи и институции.

Тој потсети дека мерките за заштита сѐ уште се на сила и дека се многу важни во превенцијата од зголемување на бројот на новозаразени.

– Заклучивме да се зголеми присуството на инспекциите и да се користат сите механизми за предупредување и примена на репресивните мерки, па и казни, кон сите што не ги почитуваат мерките за заштита. Во моментот тоа е единствено ефикасно оружје кое што треба да го употребиме. Ќе има и разговори со одредени целни групи, бидејќи загрижува фактот што најголем процент на новозаразени наши сограѓани се на возраст од 15 до 30 години. Сограѓани, кои во принцип, се најмобилни и коишто заради возраста или начинот на живот се најприсутни во тие објекти каде има групирање и во кои можеби се заборава на мерките и на подисциплинираното придржување кон мерките – информираше градоначалникот Јаневски.

Вчера во Струмица беа регистрирани 18 нови случаи.