ЗАПЛЕНЕТИ КОТУРИ САЈЛА СО ДИЈАМАНТСКИ ПРСТЕНИ Царината заплени лекови, цигари, маслиново масло и објективи за камери

Царинските службеници открија повеќе обиди за криумчарење разна стока, при што привремено се задржани котури сајла со дијамантски прстени наменети за сечење мермер, лекови, објективи за камери, цигари, маслиново масло и ремени за товар, соопшти Царинската управа.

„Запленети се 18 котури од по 10 метри сајла со дијамантски прстени, наменета за сечење мермер.  Тие се откриени од страна на царинските службеници од царинската испостава Богородица, по извршен детален преглед во задниот дел во багажниот простор во ауди А8 со косовски регистарски таблички управувано од косовски државјанин. Непријавената стоката била покриена со заштитна навлака за одело, врз која биле ставени три патни торбици со личен багаж. Вредноста на непријавената стока е 664.200 денари. Таа е привремено одземена од лицето, а против сторителот до надлежното ОЈО е поднесена кривична за криумчарење по член 278 од КЗ“, соопшти Царинската управа.

Откриени се и 63 пакувања со разни лекови и медицински материјали  – сирупи, таблети, чепови, спрејови, клизми, ленти за бандажирање и друго.

„Тие се откриени од страна на мобилни царински тимови, пронајдени во автомобил со германски регистарски таблички, управуван од македонски државјанин, пријавен за влез во државата на граничниот премин Табановце“, соопшти Царината.

Спречено е и криумчарење на објективи за камери и на ремени за товар.

„Пронајдени се 4 објективи за камери, марка ARRI Signature Prime, пронајдени во куфер сместен во багажникот на автомобил со бугарски регистарски таблички, управуван од бугарски државјанин, пријавен за влез во државата на граничниот премин Деве Баир. Вредноста на објективите изнесува 4.808.700 денари, а избегнатите давачки изнесуваат 1.149.279 денари. 60 ремени за затегнување на товар, пак, с откриени од страна на мобилни царински тимови. Тие се пронајдени во багажникот на автомобил со австриски регистарски таблички, со кој македонски државјанин се пријавил за влез на граничниот премин Табановце автопат“, се вели во соопштението.

Спречен е шверц и на 30 штеки цигари без акцизни маркички. Тие се откриени во 3 одвоени случаи, при контрола на 3 возила управувани од македонски државјани, пријавени за влез во државата на граничниот премин Дојран. На преминот Богородица, пак, спречен е шверц на 17 штеки цигари без акцизни маркички, откриени во 2 одвоени случаи, при контрола на 2 автомобили со македонски регистарски таблички, управувани од македонски државјани.

„472 лименки со вкупно 153 литри маслиново масл се пронајдени во просторот за резервна гума, како и во повеќе кутии и торби сместени во внатрешноста и во багажниот простор на автомобил со словенечки регистарски таблички, управуван од словенечки државјанин пријавен за влез во државата на граничниот премин Меџитлија. Вредноста на производите изнесува 60.000 денари, а избегнатите давачки изнесуваат 10.800 денари“, соопшти Царинската управа.