ЗАКОНОТ ЗА КРЕДИТОТ ОД УНГАРИЈА ПОМИНА НА ВЛАДИНА СЕДНИЦА Наскоро ќе се најде пред пратениците, вели Мицкоски
Ако законот помине во Собранието, министерката за финансии ќе отпатува во Унгарија каде ќе го потпише договорот за кредитот.
Законот којшто се однесува на кредитот што земјава треба да го земе од Унгарија денеска помина на владина седница и според најавите на премиерот Христијан Мицкоски многу скоро ќе се најде пред пратениците.
Откако ќе помине во Собранието, министерката за финансии ќе отпатува во Унгарија каде ќе го потпише договорот.
– Условите се оние што ги зборуваме – 3,25 проценти каматна стапка, три години грејс период, на 24 полугодишни рати кои ќе се плаќаат секој февруари и секој август. Моментално тоа се услови што не можеме ни приближно да ги обезбедиме на кој било друг пазар – рече Мицкоски по денешната прес-конференција во Владата.
Кредитот, како што посочи, има развојна компонента затоа што дел ќе оди за развој на стопанството и на општините.
Кредитот од Унгарија во висина од половина милијарда евра беше договорен за време на посетата на премиерот Христијан Мицкоски на Вашингтон каде се сретна со унгарскиот премиер Виктор Орбан.