ЗАКОНОТ ЗА БРАНИТЕЛИТЕ ПАК ЈА „ЗАГЛАВИ“ КОМИСИЈАТА ЗА СОЦИЈАЛНИ РАБОТИ Според Салиу Фетаи, седницата е одложена на неоредено време

Собраниската комисија за социјална политика, демографија и млади и понатаму останува заглавена.

Денешната седница повторно беше прекината, откако пратениците од СДСМ побараа дневниот ред да се дополни со предлог-измените на Законот за бранители, а претседавачот на Комисијата Имрлије Салиу Фетаи не се согласи со тоа. Фетаи укажа на тоа дека е назначена од претседателот на Собранието да ја води седницата само за да се разгледа предлог-законот за заштита на децата.

Седницата беше прекината по барање на пратениците од коалицијата Вреди. Како што посочи Салиу Фетаи, седницата се прекинува на неопределено време. Според неа за предлог-законот за бранители се поминати сите рокови.

Пратеничката од СДСМ Јованка Тренчевска рече дека има деловничко право да предложи дополнување на дневниот ред и дека претседавачот на Комисијата мора да го стави ваквиот предлог на гласање, бидејќи предлог-законот за бранителите сè уште го има во системот.

– Без разлика дали законот ви се допаѓа или не, немате право да го ускратите моето деловничко право да предложам дополнување на дневниот ред – рече Тренчевска.

Пратениците од ВМРО-ДПМНЕ реагираа со забелешка дека ваквиот потег на опозицијата е лицемерен, бидејќи пратениците од СДСМ не беа присутни на седницата на 12 септември минатата година, кога првично оваа точка требаше да биде на дневен ред.

Измените на Законот за бранители се предлог на Славјанка Петревска од СДСМ и го поминаа првиот филтер кога на пленарна седница лани во септември мнозинството изгласа потреба да се донесат. Во рок од 24 часа измените требаше да ја поминат Комисијата за социјална политика, демографија и млади, но тогашната претседателка не го стави законот на дневен ред, туку само законот со кој се зголемија пензиите. Потоа во повеќе наврати одбиваше да го стави законот на дневен ред, со образожение дека тоа нема да се случи ако во него не се стават и правата на борците на ОНА. Поради тоа против неа беше изгласана интерпелација, а таа поднесе оставка од претседателската функција во Комисијата. Оттогаш претседателското место е празно, а седниците ги води пратеник што е назначен од претседателот на Собранието, Африм Гаши.