Закажана лидерска средба кај Пендаровски, ќе се одржи утре напладне
На средбата покрај лидерите на партиите со пратенички мандати ќе учествуваат и претседателот на Собранието Талат Џафери и претседателот на Владата Оливер Спасовски.
Лидерска средба ќе се одржи утре напладне во Кабинетот на Претседателот во „Вила Водно“, соопштија од Кабинетот на претседателот СтевоПендаровски.
Како што е соопштено на средба се поканети претседателите нa парламентарните политички партии од власта и од опозицијата кои на последните парламентарни избори освоија пратенички мандати со самостојни листи.
„На средбата се поканети претседателот на СДСМ, Зоран Заев, претседателот на ВМРО-ДПМНЕ, Христијан Мицкоски, претседателот на ДУИ, Али Ахмети, претседателот на Алијанса за Албанците, Зиадин Села, претседателот на Алтернатива, Африм Гаши, претседателот на Движење Беса, Билал Касами и претседателот на ДПА, Мендух Тачи“, стои во соопштението.
На средбата ќе учествува и претседателот на Собранието Талат Џафери и претседателот на Владата Оливер Спасовски.
Во соопштението не се наведува темата на дневен ред, но се очекува да се разговара за организирање на предвремените парламентарни избори и евентуално утврдување на датумот за избори за кој партиите имаат различни ставови.