Заканувачот на новинарките, Емил Јакимовски осуден на година и осум месеци затвор

Заканувачот на новинарките и ексвработен во Централен регистар, Емил Јакимовски доби година и осум месеци затвор со задолжително психијатриско лекување, објави порталот „Јанаки знае“. Персудата е донесена од Основниот кривичен суд во Скопје.

Застапник на обвинението е Јавен Обвинител Наташа Сарамандова, судечки судија Џенета Бектовиќ, бранител на обвинетиот поставен по службена должност е Иванка Јакимовска, додека адвокат на оштетената Јанаки Митровски.

Првото дело кое му се ставапе на товар, обвинетиот го сторил на начин што со умисла извршил повеќе временски поврзани дејствија кои претставуваат повеќекратно остварување на истото дело, притоа искористувајќи ист траен однос и исти прилики. Тој, како поранешен сопруг на една оштетена, при вршење семејно насилство и ја загрозил сигурноста со сериозна закана дека ќе нападне врз нејзиниот живот и тело и врз животот и телото на нејзино блиско лице – нејзиниот татко.

Обвинетиот се товари дека второто дело го сторил на 10 јануари, кога по пат на информатички систем и се заканувал на оштетена дека ќе изврши кривично дело –Убиство за кое е пропишана казна затвор од најмалку пет години. Заканите ги упатувал преку пораки и мобилни апликации, па оштетената се почувствувала дека и е загрозена личната сигурност.

Истражната постапка за истото лице беше поведена и за кривично дело – Неизвршување на судска одлука од член 377 став 5, но за ова дело не е поднесено обвинение, бидејќи во текот на постапката се утврди дека Решението на Основниот граѓански суд Скопје со кое била издадена наредба – Привремена мерка за заштита на правата на оштетената од семејно насилство се уште не е правосилно.

Емил Јакимовски со решение на Основниот кривичен суд Скопје се наоѓа во притворското одделение на Затвор Скопје.