Заев за Вечерњи лист: Борбата со ковид-19 е во преден план, но СДСМ е фаворит на овие избори

Сега е време да се мисли за здравјето на луѓето не за избори, но СДСМ е фаворит на овие избори, Тоа  го покажуваат сите релевантни истражувања од реномирани домашни и меѓународни агенции. СДСМ во тие анкети има сериозна предност во однос на ВМРО-ДПМНЕ . Но и ако ги изгуби изборите СДСМ нема да се повлечам од политиката.

Ова покрај другото го вели лидерот на СДСМ и поранешен пермиер Зоран Заев во интервју за хрватскиот весник „Вечерњи лист“. Тој во интервјуто зборува за соработката со Хрватска, влезот на земјава во НАТО и отворањето на пристапните преговори со ЕУ за мерките во борбата со коронавирусот.

– Со два клучни стратешки приоритети, членството во НАТО и одлуката за преговори со ЕУ, со сите економски резултати од изминатите две и пол години, СДСМ е фаворит на изборите. Сите релевантни истражувања од реномирани домашни и меѓународни агенции покажуваат сериозна предност на СДСМ во однос на ВМРО-ДПМНЕ. Граѓаните точно знаат како да прават разлика помеѓу оние кои работат за нивните интереси и оние што го следат популизмот и политиката, така што нема страв од пораз. За само две и пол години, постигнавме клучни достигнувања дома и во странство. Станавме 30-та членка на НАТО, започнуваме преговори со ЕУ, ја стабилизиравме економијата и ја ставивме на добра основа. Од -1,8%, остваривме економски раст од 3,6%, рекордно ниска невработеност, а платите се зголемија во сите сектори. Тоа ќе ни помогне сега да се справиме со последиците од претстојната економска криза. Граѓаните го гледаат и го знаат тоа – вели  Заев.

Тој не се колеба да остане во политиката и ако СДСМ не успее да победи на претстојните парламентарни избори.

– Учеството во политичкиот живот е привремена работа, важно е колку и како им помогнаме на граѓаните, државата, општеството. Во една прилика, на една од нашите состаноци, реков дека сѐ уште се загревам. Во моментов, мојот фокус е придонес во борбата против коронавирусот, во формулирањето на политики и мерки, особено во областа на економијата, како да се заштитат работните места, како да се обезбедат приходи за граѓаните, како да им се помогне на работниците, деловните субјекти на сите граѓани. Не размислувам за повлекување – вели Заев.

Во врска со одложените избори Заев вели дека главна причина за тоа е пандемијата на коронавирусот.

– Ситуацијата бараше брза реакција и одлуки кои се во интерес на најскапата работа, здравјето на граѓаните. Нашата земја реагираше навремено и соодветно, многу подобро од некои европски земји и веднаш, на самиот почеток, презеде соодветни мерки за да ги заштити своите граѓани. Како претседател на владејачката СДСМ, јас бев првиот што побарав да се прогласи вонредна состојба, така што техничката влада би можела да дејствува подобро и побрзо, подобро да се справи со кризата и брзо да се спречи ширењето на вирусот. Сите наши сили биле и сѐ уште се фокусирани на борбата против коронавирусот. Рековме, сега не е време за избори, сега е време да го заштитиме здравјето на граѓаните, да спасиме што е можно повеќе човечки животи. Така постапуваме. Првичните резултати се видливи, здравствениот систем добро се справува со кризата. Нека заврши кризата, па ќе размислуваме за изборите – вели Заев.

Тој , како што вели, не се чувствува како предавник на својот народ поради промената на името на државата во преговорите со Грција.

– Се чувствувам како горд политичар – патриот кој ја сака својата прекрасна земја и кој направи се за да ѝ обезбеди сигурна иднина. Ова е придобивка за сегашните и идните генерации. Како Македонец, јас сум особено горд што успеавме да го обезбедиме нашиот македонски идентитет, еднаш засекогаш, македонскиот јазик, така што никој нема да го оспорува. Горди сме што за само две и пол години од „заробена држава“ успеавме да станеме „одличен пример“ во регионот. Сметам и верувам дека повеќето граѓани го споделуваат моето мислење, а тоа е дека конечно успеавме да изградиме држава која ја обезбеди својата сигурна иднина, држава која функционира како рамноправно општество за сите – вели Заев.