Заев за Рашковски: Никој не е недопирлив, институциите треба да докажат или не вина
Сепак, повторувам нема недопирливи ниту кај власта ниту кај опозицијата. Законот важи за сите.Институциите работат и треба да постапуваат, рече премиерот.
Премиерот Зоран Заев тврди дека законски е спроведена јавната набавка за софтверот за следење на сообраќајот, но вели, истрагата на институцииите треба да покаже дали има вина кај Драги Рашковски во целата постапка.
Ова премиерот го изјави по денешното приведување на поранешниот генерален секретар на Владата Рашкоски.
— Сметам дека јавната набавка на софтверот за сообраќајни прекршоци е направена согласно законот за Влада и деловникот на Владата, а преку генералниот секретаријата сме набавувале и други работи. Според мене сѐ е законски, но главниот збор сепак го има судот, и нема да дискутирам. Можеби сум пристрасен, бидејќи Рашковски работеше со мене и во претходната влада. Тоа институциите ќе кажат. Важно е дека никој однапред не може да се нарече виновен, бидејќи сметам на презумцијата на невиност. Софтверот беше тестиран, а треба да си признаеме дека имаме 164 жртви од сообраќајни несреќи, имаме инвалиди, а државата има загуби. Немаме софтвер на Рашковски, туку софтвер кој не е изработен од Рашковски и сметам дека постапката е законска. Сепак, повторувам нема недопирливи ниту кај власта ниту кај опозицијата. Законот важи за сите. Институциите работат и треба да постапуваат – рече Заев.
Заев рече дека Мухамед Зекири како сегашен генерален секретар ги достави сите документи во однос на оваа постапка.
Драги Рашковски денеска беше приведен и против него се води постапка за злоупотреба на службената положба и овластување и го оштетил буџетот со 178.868 евра.Обвинителството за гонење организиран криминал и корупција тврди дека Рашковски, кој беше и генерален секретар на владата со умисла извршил три временски поврзани дејствија, што претставуваат повеќекратно остварување на кривично дело.
Обвинителството денеска објасни дека во истрагата дошло до сознанија дека пред спроведување на постапката за јавна набавка на софтвер, Рашковски ја договорил набавката на софтверот со третоосомничениот и доставил сопствен патент за кој дал насоки за изготвување на техничка спецификација за јавната набавка.