ЗАЕВ ВЕЧЕРВА ЌЕ ГИ СМИРУВА СТАРИТЕ ПАРТНЕРИ Африм Гаши доби бинго, а тие – празни џебови?
Вечерва ќе се знае дали за Горан Милевски и Павле Трајанов останала по некоја трошка од колачот на власта, или ќе мора да се помират со фактот дека лидерот на Алтернатива е новата ѕвезда во владејачката коалиција што Заев наскоро ја напушта.
Премиерот Зоран Заев вечерва ќе ги информира партиите од владината коалиција за договорот за влегување на Алтернатива во Владата, јави МИА.
Средбата е закажана во 18 часот, а за исходот јавноста ќе биде информирана со соопштение.
Се очекува Заев да ги информира старите партнери за новиот состав на Владата, во која Алтернатива на Африм Гаши ќе има дури тројца министри и тројца заменици-министри. Гаши вчера потпиша програма за заедничко дејствување и приклучување во Владата со претседателот на СДСМ и премиер Зоран Заев, кој најави дека заминува од двете функции на 12 декември.
За составот на новата влада ќе одлучува новиот мандатар и тоа ќе биде по неколку недели. Освен министерските и заменичките места, партијата на Гаши ќе добие и функционерски места во повеќе централни и подрачни институции, меѓу кои МЕПСО, ФЗОМ, Железници, Клиничкиот центар во Тетово, Агенцијата за странски инвестиции и други.
Либерално демократската партија, којашто заедно со ДОМ е дел од владејачката коалиција, очекувала премиерот Зоран Заев да ги информира за договорот со Алтернатива, со цел партијата да реши дали за неа договореното е прифатливо.
– Немаше потреба да се прават овие театри еден месец и да се фокусира јавноста, бидејќи државата има еден силен предизвик во декември, а тоа е почеток на преговори и целата енергија на политичкитe чинители треба да се насочи кон решавање на овој проблем, којшто ќе значи подобар животен стандард на граѓаните. Наместо да се занимаваме со личните позиции и кадровските решенија коишто очигледно се договорени – изјави лидерот на ЛДП Горан Милевски, чија партија, заедно со ДОМ, има тројца пратеници и само едно министерско место во Владата.
И Павле Трајанов, лидерот на Демократски сојуз, се огласи со критика на договорот Заев – Гаши.Тој смета дека не смее да се преговара за ревизија на завршени судски процеси и дека фактот што сега во новата влада меѓу министрите може да има повеќе етнички Албанци отколку Македонци го нарушува етничкиот баланс предвиден и со Рамковниот договор.