Заев: Никој не сака да му се крати платата, но товарот на кризата треба да го носиме сите

Јасно е дека никој не сака да му се нарушат редовните месечни примања, но затоа секој треба да сфати дека со ова дел од товарот носиме сите, но воедно им помагаме и на оние кои поради тоа што не работат заради коронавирусот, се соочени да не добијат никава плата во следните месеци, вели лидерот на СДСМ Зоран Заев во интервју за Фактор, во кое ги образложува мерките на СДСМ за стпавување со кризата.

Според него, со намалувањето на платите на функционерите и јавниот сектор на ниво на минимална плата од 14.500 денари, како и исплатата од страна на владата по една минимална плата за април и мај за вработените во фирмите погодени од крзата, бескаматните кредити, потоа 7.000 денари помош за домаќинствата чии членови немаат работа или се ангажирани во неформалната економја, стопирањето на извршувањето и одложеното плаќање на ратите за кредитите…, ќе може да се преброди првиот удар од кризата.

Заев вели дека овие мерки се потребни бидејќи во државната каса се собираат се помалку пари што е резултат од неработење на најголемиот дел од секторите, а граѓаните помалку трошат.

– Се очекува поради кризата со коронавирусот, приходите во буџетот да се намалат за 60 отсто, што според него, може да значи недостиг од 2,2 милијарди евра. Дури и државата да најде 1,2 милијарди евра преку кредити, една милијарда евра мора да се обезбеди од дома, преку заштеди. Затоа се неопходни мерките кои ги предложи СДСМ – вели Заев.

Заев тврди дека првичната помош е околу 200 милиони евра и дека следи нов пакет мерки и најавува мерки за штедење.

– Непродуктивните трошоци веќе се кратат, според информациите што ги имам, веќе се ослободуваат нешто над 7 милијарди денари, се следат овие процеси и соодветно се преземаат мерки. Но, во вакви услови тоа нема да биде доволно, тоа е само еден дел од заштедите. Според првичните проценки, ќе недостасуваат над 60 милијарди денари, така што тие непродуктивни трошоци ќе се скратат, ќе се скрати се што значи одлив пари надвор, но сепак ќе треба многу повеќе за да се обезбедат средства со кои полесно и побрзо ќе ја минеме кризата од коронавирусот. Имаме издржани предлози, верувам дека ќе успееме – вели тој.

Заев очекува Владата да ги прифати овие предлози на СДСМ бидејќи се ефикасни.

– Јас сѐ уште верувам дека ова е најефикасниот и најкраткиот пат кој ќе нѐ извади од кризата.Тоа треба и мора да биде пат на солидарност и меѓусебно помагање. Тоа треба да биде заеднички споделен товар од сите, затоа што ова нѐ допира сите. Секој човек е важен и така треба да се однесуваме. Ова е борба за здравјето на секој човек, ова е борба да се сочува секое работно место и да се обезбеди приход за секој човек. Сите сме дел од проблемот и сите треба да бидеме дел од решението, со кое ќе ја пресретнеме економската криза а ефектите од неа да бидат што помали – вели Заев.