Заев нема пак да се тестира, Петровска немала контакт со пратениците, сите го чекаат Советот за безбедност

Премиерот Зоран Заев нема повторно да се тестира на ковид-19, бидејќи како што изјави за Плусинфо немал контакт со неговиот советник за комуникации Марјан Забрчанец, кој вчера преку Фејсбук соопшти дека е позитивен на коронавирусот. Пратеничката од СДСМ Славјанка Петровска која вчера информира дека е позитивна, тврди дека ги почитувала мерките и дека немала контакт со пратениците.

Денеска сите се во очекување на состанокот на Советот за безбедност свикан од претседателот на државата Стево Пендаровски и одлуките кои ќе бидат донесени за сузбивање на пандемијата на коронавирусот.

Ден претходно и министерот за внатрешни работи Оливер Спасовски објави дека е позитивен на ковид-19, така што речиси нема ден некој од Владата или од Собранието да не информира дека добил позитивен тест. Дали ова ќе влијае како натаму ќе работи Собранието и другите институции ќе биде појасно по состанокот на Советот за безбедност.

– Немав контакт со Марјан Забрчанец – ни пиша по порака премиерот Заев на прашањето дали повторно ќе се тестира.

Пратеничката Петровска вели дека била на седницата пред пленарната, но не и на попладневната седница.

– Бев, но на седницата пред пленарната, на таа попладнето не бев, затоа што претходно имав температура и веднаш штом почувствував дека не сум добра се повлеков во мојата канцеларија за кратко и веднаш излегов од Собрание. Директен контакт со пратеници или служба немав, носев маска Н95 постојано, а во мојата канцеларија сум сама – ни изјави Петровска.

Координаторот на пратеничката група на ВМРО-ДПМНЕ Никола Мицевски вели дека пратениците ги почитуваат мерките.

– Контакти нема. Сите ги почитуваат мерките. Носиме маски и секој е сам во канцеларија. Од пратеничката група засега нема пријавено дека некој се чувствува лoшо. Очекуваме Собранието да биде функционално. Парламентот сѐ уште нема потпретседатели, а нема пречка да ги избере. Не се формирани ниту делегациите за соработка со другите земји. Не е формиран ниту Националниот совет за евроинтеграции, кој е клучен за соработка во време на пандемија како и Мешовитиот комитет. Ги чекаме одлуките на Советот за безбедност, ќе видиме како понатаму – вели Мицевски.

Власта и опозицијата не можат да се договорат дали Собранието треба да работи онлајн, до стивнување на епидемијата со ковид-19. Власта го турка предлогот барем позитивните пратеници на седниците да се вклучуваат онлајн, додека опозицијата е на став дека за онлајн работа на Парламентот се потребни уставни измени и дека кога сите други вработени одат на работа, а децата во училиште тогаш и пратениците својата функција треба да ја извршуваат во собраниската зграда, а не од дома.