Заев: Не можам да ѝ се јавам на норвешката премиерка и да ургирам за Охрид

Независно каква ќе биде одлуката на Комитетот за Светско наследство при Организацијата на ОН за образование, наука и култура за статусот на Охридскиот регион во УНЕСКО, ние ќе ја почитуваме, изјави претседателот на Владата Зоран Заев кој денеска беше во работна посета на Охрид.

– Таму нема политика и не можете да се јавите на сите наши пријатели. Северна Македонија во овој период изгради многу силни меѓународни пријатели, но тука не е политиката во прашање. Таму се експерти со доминантно влијание на претставниците од нордиските земји. Норвешка го води целиот овој проект и е најгласна, наша пријателска земја, но не може премиерот Заев да се јави на премиерката на Норвешка. Тоа не функционира така. Врз основа на докази, на експерти, врз основа на тоа што е направено дебатата е отворена, вчера траеше цел ден. Дел сте информирани, мене ме брифираат нашите државни и општински претставници за сите детали. Денеска некаде после пладне се очекува да биде донесена одлука. Но, јас сум задоволен што го свртевме вниманието и гледам дека се работи – рече тој прашан дали се лобирало за да се добијат дополнителни рокови за исполнување на препораките посочени од УНЕСКО.

Во Кина се одржува расправа на Центарот и советодавните тела на УНЕСКО од каде се очекува конечна одлука за тоа каков ќе биде идниот статус на регионот.

– За нас е мотивација, и за државната власт и за локалната власт, да продолжиме. Сите знаеме дека Охрид ќе продолжи да се развива и мора да се развива. Не треба да биде запрен развојот на Охрид. Но, тоа мора да биде по план, така што максимална поддршка ни треба пред сѐ од граѓаните. Каква и да биде денеска одлуката ние ќе ја почитуваме. Некој пат како што беше до пред вчера, прифативме дури и ставањето под опасност значи аларм кај нас уште повеќе да бидеме фокусирани. Ќе ни биде драго и особено ќе го почитуваме ако го дадат тој дополнителен рок што ќе дискутираат таму на тие заседанија, затоа што не е ред светот да води грижа за Охрид, ред е ние да водиме грижа дома и верувам дека ќе успееме – истакна Заев.

Премиерот истакна дека одговорноста за долгогодишната негрижа кон Охрид не може да се лоцира.

– Одговорноста не можете да ја лоцирате, ниту во нашите, ниту во меѓународните закони, поради тоа што тоа низ времето е дозволено сѐ. На крајот државите немаат за цел да санкционираат или да отворат постапки судски, правни, или какви било. Главната цел е да не се повтори тоа што го довело Охрид, Охридското Езеро и охридското крајбрежје и целиот заштитен регион воопшто да се дискутира за тоа. Да ни биде поука и да учиме. Охрид, нашето прекрасно Охридско Езеро треба да го чуваме такво какво што природата и Господ ни го дариле. И верувам дека ќе успееме во тоа, а притоа да се развиваме и токму поради неговата посебност да биде атракција – рече премиерот.

Градоначалникот на Охрид, Константин Георгиески, по однос расправата во УНЕСКО рече дека независно од одлуката ќе се удвојат напорите и активностите за исполнување на препораките посочени во извештаите на Реактивните мисии на Комитетот за светско природно и културно наследство.

– Доколку добиеме дополнителен рок од две години, ќе продолжиме уште поодговорно, уште похрабро да работиме на имплементацијата на препораките. Она што е во наша надлежност како општина е усогласување на деталните урбанистички планови, отстранување на бесправно изградените објекти. Ние покажавме решителност и дека не се двоумиме во однос отстранувањето на дивоградбите, така и ќе продолжиме – рече Георгиески, најавувајќи дека процесот ќе продолжи после завршувањето на летната туристичката сезона.