800 фантоми – денешна тема за деблокада на Собранието

Измените на Законот за државјанство ќе бидат единствената тема за која денеска на средба во 10 часот ќе се обидат да најдат решение координаторот на пратеничката група на Алијанса за Албанците и Алтернатива Скендер Реџепи и премиерот Зоран Заев и министрите за правда и МВР, Бојан Маричиќ и Оливер Спасовски.

Како што веќе објави Плусинфо и од двете страни има расположение да се реши статусот на граѓаните кои немаат државјанство, а кои пред осамостојувањето живееле во Македонија.

Лидерите на АА-А Зијадин Села и Африм Гаши ќе се сретнат со Заев само доколку, како што вели Реџепи, се запне на некое прашање.

Реџепи потенцира дека волја за решавање на овој проблем има, но и дека без оглед дали власта и опозицијата ќе се усогласат за Законот за државјанство, тоа не ги менува нивните позиции за измените на Законот за попис. Алијанса и Алтернатива се против одложување на пописот.

– Ако најдеме решение за државјанствата тоа ќе значи одблокирање на работата на Собранието, додека за одложување на пописот ќе водиме суштинска дебата – вели Реџепи.

Според министерот за внатрешни работи Спасовски, ќе се бараат решенија во рамките на уставните надлежности, законските процедури и меѓународната пракса.

Анализите во МВР покажале дека има околу 800 граѓани кои не поседуваат никаков документ, а се на територијата на нашата држава. Спасовски вчера изјави дека тој проблем е надминат и дека тие се евидентирани во матичната книга на родените.

И премиерот Заев е убеден дека е можно решение за таканаречените фантоми. Според него, битно е тие граѓани да имаат некаков документ, како на пример свидетелство од дете, потврда дека биле или се приматели на социјална помош, еден од сопружниците да има државјанство… И Заев и Спасовски се децидни дека за добивање државјанство мора да се приложи некаков документ и дека со изјава на тројца сведоци е невозможно да се доби државјанство.

За решение на ова прашање ќе се повикуваат и на либералните искуства и практики во земјите во светот.

Во измените на Законот за државјанство предложени од Алијанса и Алтернатива се предлага наместо 8 години престој како услов за државјанство да биде четири години, тројца сведоци да потврдат дека лицето во Македонија живеело и пред независноста, да може и со еден сведок ако тоа е сѐ уште жител на местото на барателот. Наместо да го познава македонскиот јазик да се дефинира како познавање на најмалку еден од службените јазици во државата, се мисли на албанкиот јазик.

За ова, според информации од власта, ќе се понуди лицата да ја познаваат историјата и културата на Македонија, по урнек на економските државјанства.