ГОТОВ Е ПРОЕКТОТ ЗА РЕНОВИРАЊЕ НА ИНФЕКТИВНОТО ВО ВЕЛЕС Почетокот ќе зависи од ребалансот на буџетот
Владата донесе одлука за инвестиција од 75 милиони денари за целосно реновирање на Инфективното одделение во велешката болница и нов систем за медицински гасови. Според заменик-министерот за здравство, проектот е готов, а почетокот на работите ќе зависи од ребалансот на буџетот и финансиската состојба.
Владата донесе одлука за целосно реновирање на зградата на Инфективното одделение на велешката Општа болница со 75 милиони денари, инсталирање на систем за гасови за операционите сали на болницата, информира заменик-министерот за здравство Јовица Андовски по денешната посета на болницата при увидот на набавена вредна нова здравствена опрема.
– Проектот за Инфективното одделение за велешката ЈЗУ Општа болница е веќе направен. Тој заврши и сега сме во фаза на буџетирање. Тоа ќе биде во следната 2027 и 2028 година, а се зависи од кондицијата на буџетот на Министерството за здравство – најави Андовски.
На прашањето дали има можност овој значаен проект за пациенти од Велес и велешкиот поширок регион да стартува до крајот на годинава или почетокот на идната година, заменик-министерот Андовски одговори дека за тоа ќе може да одговори по ребалансот на буџетот.