ЗА МНОГУМИНА ВО ЕУ НАШИОТ ПРИСТАП Е ЛОГИЧЕН, КОРЕКТЕН И СООДВЕТЕН Со фокус врз вистинските реформи, најбрзо од сите ќе станеме дел од ЕУ

Доколку го ставиме фокусот на реалните реформи, ќе бидеме една од земјите која најбрзо се движи кон полноправно членство во Европската Унија, вели министерот за надворешни работи, Тимчо Муцунски.

– При претставувањето на позицијата за одложена примена на уставните измени не ветивме дека преку ноќ ќе се најде решение, но, велиме дека имаме принципиелна позиција и тоа го аргументираме пред меѓународната заедница, земјите членки и пред европските институции. Со овој пристап го штитиме националниот интерес, односно да не бидеме во ситуација, како што сме биле во минатото, со неочекувано вето. Воедно, го штитиме и среднорочниот и долгорочниот кредибилитет на Европската Унија – реле Муцунски од Брисел, во интервју за „360 степени“.

Министерот вели дека ставот за одложената примена на уставните измени е презентиран на многу средби и ја покажува подготвеноста на Владата за компромис, но компромис кој носи извесност.

– Многу од соговорниците од ЕУ сметаат дека нашиот пристап е логичен, коректен и соодветен, но тоа е пристап што бара прифаќање од Бугарија како наш сосед. Европската Унија е базирана на култура на компромиси – додаде Муцунски.

Министерот смета дека од брзоплети односи базирани на апстрактни рокови сме тука каде што сме, со нови блокади и вето.

– Затоа не е логично да работиме со рокови, туку со принципи и јасен став, како што работиме во моментов – додаде тој.

Во врска со можноста да се најде решение за продолжување на евроинтеграцискиот пат на Македонија, министерот Муцунски истакна дека ЕУ не може да си дозволи дополнително одолговлекување на проширувањето со Западен Балкан.

– Гледано од геостратешки аспект, Европа не може да си дозволи политичко-безбедносен вакуум во нашиот регион. Ние сме земја која е целосно усогласена со заедничката безбедносна политика на ЕУ и која усвои реформска агенда. Ќе продолжиме со реформите во сите области, следејќи ги препораките на Европската Унија – рече Муцунски.

Негово лично уверување е дека ако се стави фокусот на реалните реформи, ќе бидеме една од земјите која најбрзо ќе се движи кон полноправно членство во Унијата.

– Доколку навистина се насочиме кон европските реформи, проактивно и со конкретни мерки, ќе биде тешко за која било земја на подолг рок да нè блокира. Кога имате земја што е целосно усогласена со заедничката надворешна политика и која на дело спроведува реформи, товарот за тоа ѝ припаѓа на Владата, на министрите, но и на невладиниот сектор и медиумите. Треба заеднички да се движиме низ тој процес, да ја реформираме државата и немам сомнеж дека ќе бидеме една од земјите која најбрзо ќе се движи кон полноправно членство во моментот кога Унијата ќе се отвори за нови членови – заклучи министерот Муцунски.