ЗА МЕРКО НЕМА ПРИТВОР ИАКО ТОА Е ПРАКСА ЗА ДРУГИ СЛУЧАИ Левица вели дека струшкиот градоначалник е заштитен граѓанин
Овој градоначалник е пример дека правдата е слепа кога се во прашање богатите партиски кадри. Додека за сиромашниот граѓанин органите на прогон веднаш би побарале мерка за обезбедување дури и притвор, Мерко е заштитен и продлжува да си ја врши функцијата, се вели во соопштението на Левица.
Партијата Левица обвини дека струшкиот градоначалник Рамиз Мерко не е во притвор и покрај тоа што тоа е досегашната пракса за ваквите предистраги на македонските правосудни органи. Тие велат и дека Мерко е заштитен граѓанин од богатите партиски кадри и дека ситуацијата би била поинаква ако на местото на Мерко беше некој сиромашен граѓанин.
Во соопштение до јавноста партијата вели:
„По објавата на САД дека струшкиот градоначалник и партиски член на ДУИ, Рамиз Мерко, е ставен на „црна листа“ поради криминалните активности ревносно се ангажираа и од скопското jавно обвинителство да ги прочешлаат предметите со цел да утврдат дали некој од струшкото обвинителство или суд го штити овој градоначалник.
До Основното јавно обвинителство се доставени шест кривични пријави кои стоеле во нечија фиока за да го спасат од прогон овој градоначалник кој во време на најголема криза си купи ново возило Ауди А6 за службени потреби. Како што известија од Обвинителството тие исклучително сериозно ги земале во предвид сознанијата на Стејт департментот и од тие причини постапуваат итно по секој предмет.
Сепак, и покрај тоа што е отворена предистражна постапка за шест кривични пријави, Рамиз Мерко не е ставен во притвор како што е досегашната пракса на македонските правосудни органи. Рамиз Мерко, после толку години власт и стекнато богатство, ужива статус на султан во струшката околија. Овој градоначалник е пример дека правдата е слепа кога се во прашање богатите партиски кадри. Додека за сиромашниот граѓанин органите на прогон веднаш би побарале мерка за обезбедување дури и притвор, Мерко е заштитен и продлжува да си ја врши функцијата.
Левица опоменува дека е неприфатливо, градоначалник со толку кривични пријави и индиции за сторени кривични дела сѐ уште слободно да шета, без да се преземат мерки со оглед дека може да влијае на сведоци или да избега од државата.
Дали обвинителството повторно ќе замижи пред политичкиот имунитет и ќе продолжи со маската која ни ја прикажуваат со години или навистина ќе ги примени сите средства од законот за да обезбеди правда?“, реагираат од Левица.