ЗА ДА НЕМА ГУЖВИ И НЕРВОЗИ Утре се отвораат 4 нови пункта за вакцинација во Скопје

Од утре се отвораат дополнителни четири пункта за имунизација против ковид-19 откако два дена има големи редици и нервози пред центрите за вакцинација во главниот град.

Пунктовите во Скопје кои ќе започнат со работа утре се поликлиниките Бит-Пазар, Драчево, Ченто и Ѓорче Петров. Во две смени ќе работат пунктовите во Чаир, Јане Сандански, Букурешт и Бит-Пазар. Во прва смена ќе работат Шуто Оризари, Драчево и Ченто.

„Вакцини има доволно, во сите пунктови се надополнуваат подеднакво потрошените количини. На располагање се околу 400.000 дози од вкупно сите производители. Од нив 200.000 се наменети за прва доза. За прва доза имаме 80.000 ‘Синовак’, 50.000 ‘AстраЗенека’ и 70.000 ‘Фајзер’. Секоја недела пристигнуваат по околу 20.000-30.000 од ‘Фајзер’ и оваа пратка ќе продолжи да пристигнува и во следните недели до крајот на годината“, се наведува во соопштението од Министерството за здравство.

Оттаму нагласуваат дека вакцините се безбедни и се единственото оружје со кое располагаме во борба против вурусот ковид-19.

„Вакцините штитат од тежок тек на болеста и од смртен исход од вирусот. Само со масовно вакцинирање на населението може да ги спречиме натамошните мутации на овој вирус и затоа, повикуваме на вклучување кон процесот на имунизација на сите граѓани“, се додава во соопштението од Министерството за здравство.