ЗА ЏАБЕ СЕДЕВМЕ ДОМА Локдаунот имал мал ефект на смртноста

Американски истражувачи идентификуваа непобитни докази за штетата од локдауните, со кои за време на почетните месеци од пандемија на милијарди луѓе во светот им се забрануваше движењето.

Според истражувачите од Универзитетот „Џонс Хопкинс“, ограничувањата наметнати во пролетта 2020 година, поради коронавирусот, имале мал ефект врз смртноста во САД и во Европа. Но, доведоа до сериозни економски и социјални штети.

Ограничениот пристап до отворени простори, особено паркови и плажи, ги натера луѓето да се состануваат во затворени простории, каде што ризикот од инфекција е многу поголем, сметаат истражувачите. Научниците критикуваат мерки, како што е задолжителната самоизолација – мерката ја намали смртноста од Ковид-19 за само 2,9 отсто, а во некои случаи, напротив, ја влошува ситуацијата.

– Задолжителната самоизолација може да го остави пациентот опкружен со своето семејство, каде што ризикува да пренесе поголемо вирусно оптоварување на своите роднини, а тоа да доведе до посериозна болест – нагласуваат авторите.

Сепак, тие забележуваат дека стопирањето на несуштинските активности на фирмите, имало позитивно влијание, бидејќи ја намалило смртноста за 10,6 отсто.

Експертите велат дека „затворањето“ има негативно влијание врз социо-економската ситуација во САД и во европските земји. Конкретно, зголемени се стапките на невработеност, семејното насилство, како и предозирањето со дрога. Дополнително, се влошил и квалитетот на образовниот процес.

Експертите заклучуваат дека политиките за „заклучување“, не се од суштинско значење и не треба да се спроведуваат за време на пандемија.