Вучиќ вети дека нема да го признае Косово, состанокот со Трамп и со Хоти во Белата куќа ќе биде само за сликање

Американскиот претседател Доналд Трамп, српскиот претседател Александар Вучиќ и косовскиот премиер Авдулах Хоти денеска во Белата куќа треба да отворат ново поглавје во српско-косовските односи.

Во соопштението на Белата куќа, издадено доцна синоќа, не е прецизирано што ќе биде потпишано во трилатералниот документ, па не се знае дали станува збор за формален договор или за декларација. Но, по првиот ден од преговорите во Вашингтон, Советот за национална безбедност соопшти дека делегациите на Косово и Србија постигнале напредок.

„Многу добра рунда разговори со лидерите на Србија и Косово. Нашите разговори беа во насока на зајакнување на економските врски и економскат нормализација“, напиша на Твитер Роберт О’ Брајан, советник на американскиот претседател за национална безбедност.

Но, се чини дека српскиот претседател Александар Вучиќ сепак бил под силен притисок во спорната точка 10 од документот, Србија и Косово да договорат меѓусебно признавање.

– Првиот документ кој го добивме имаше наслов „Економска нормализација“. Тој документ беше ужасно тежок, имаше 15 или 16 точки, а една од нив беше меѓусебното признавање.  Јас го одбив тоа. Од кабинетот на Трамп беа фер и не сослушаа. Во другите документи ја нема таа одредба“ – изјави Вучиќ.

Но, премиерот на Косово, Авдулах Хоти, изјави дека неговата делегација нема да разговара за ништо што не вклучува меѓусебно признавање.

– Неприфатливи договори за Косово никогаш не дошле и нема да дојдат од Белата куќа. Постигнавме голем напредок во економската соработка. Се што зборуваме за Србија се однесува на признавањето. Направивме голем чекор кон приближување. Ниту е поставено, ниту некогаш ќе се постави прашањето за границите – изјави косовскиот премиер.

Според известувачите, спорната точка 10 од документот, која подоцна наводно е отфрлена, гласи: „Двете страни се обврзуваат на заемно признавање и заштита на етничките малцинства, враќање на имотот, решавање на статусот на лица без регулиран статус и согласност за отворање канцеларија задолжена за заштита и известување на годишно ниво за малцинските права“.

Оваа точка предизвика големи тензии во разговорите во Вашингтон, но и во Србија. Српските медиуми пренесоа информации дека српската делегација и претседателот Вучиќ се под голем притисок.Но, Вучиќ од Вашингтон им се обрати на граѓаните и порача дека одбил да го прифати спорниот документ.

– Не плашете се дека ќе потпишам признавање на Косово. И точка. Тоа го кажав и на делегацијата на Косово и на Американците. Јас кажав дека не можам тоа да го прифатам, луѓето беа фер, ме сослушаа и мислам дека во следните документи таа точка ќе ја нема.

Останува да се дознае што тогаш ќе биде потпишано на церемонијата во Белата куќа. Српскиот претседател Вучиќ и косовскиот премиер Хоти ги продолжуваат преговорите. Домаќини на состанокот се О’Брајан и специјалниот пратеник на американскиот претседател за преговорите меѓу Белград и  Приштина, Ричард Гренел. Вучиќ потврди дека во еден момент на состанокот дошла и Иванка Трамп, ќерката на претседателот Трамп, која е и советничка на американскиот претседател. Со Иванка Трамп се разговарало за развојот на претприемништво на Балканот, особено за женското претприемништво во Белград и во Приштина.

Но, извесно е дека од Вучиќ и од Хоти на средбата во Овалната соба со американскиот претседател Доналд Трамп се очекува нешто повеќе од разговор за женското претприемништво. Според Гласот на Америка, по средбата во Белата куќа, Вучиќ и Хоти, секој посебно, ќе се состанат со американскиот државен секретар Мајк Помпео во Стејт департментот.

Известувачите и посматрачите прогнозираат дека Вучиќ сепак ќе ги издржи притисоците и нема да договори меѓусебно признавање меѓу Србија и Косово. А без тоа, резултатите од оваа средба ќе бидат далеку од спектакуларни. Што, пак, не значи дека спектаклот за медиумите ќе изостане.