Вучиќ: Од 1 јануари 2023 година ќе нема граници меѓу нашите земји

Регионалната иницијатива што досега беше позната како „Мини шенген“ е победа за иднината, нешто што ќе ги промени работите на Балканот и потврда дека сме способни самите да одлучуваме за себе, да го подобруваме животот на нашите граѓани, изјави претседателот на Србија Александар Вучиќ во воведното обраќање на Економскиот форум во Скопје.

– Кога започнавме со оваа иницијатива на сите нам тројца ни се причини дека оваа иницијатива е нешто што е добро, што е победа за иднината и нешто што ќе ги промени работите на Балканот. Сите оние работи за коишто многу лесно ги наоѓавме недостатоците едни на други, со многу леснотија наоѓавме причини за меѓусебни кавги. И кога разговаравме за ова сметавме дека би било многу добро за сите оние коишто ни се најблиски, а Србија и Албанија никогаш не биле толку многу блиски. Во минатите две години развиваме една искрена доверба помеѓу нас во смисла на развивање на односите кон регионот, кон ЕУ и кон светот. Ние сите сме на европскиот пат, меѓутоа не сме ниту глупави ниту наивни да веруваме дека некој ќе работи во полза на нашите земји доколку ние тоа самите не го правиме. Затоа е особено важно за луѓето во нашите земји да им покажеме како во Албанија, така и во С Македонија и во Србија дека сме во можност и способни сме самите да одлучуваме за себе, да го подобруваме животот на нашите граѓани, да одиме на нашиот европски пат, да работиме со сите, но да не чекаме дека некој ќе нè води и насочува. Спремни сме да ја земеме судбината во свои раце и да работиме во интерес на нашите граѓани – рече Вучиќ.

Тој нагласи дека е многу важна полната доверба која веќе се случи меѓу тројцата, затоа што сето она што стои зад овој предлог е за просперитет на сите и нема скриена агенда. Тој укажа на предностите кои ќе ги донесе олеснето движење на луѓето, капиталот, добра и услуги, камо и во однос на привлекувањето на странски инвестиции.

– Ни се отвораат големи, бескрајни можности и се од полза за сите три земји. Нашите три земји ќе ја завршат годината со вкупно 76 милијарди евра БДП, тоа е БДП помал од една Словачка. Колку години ни се потребни да го стигнеме. Десетина години?. Не, за само 5-6 години максимум и ги престигнуваме. Тогаш почнуваме во потполност да ги менуваме позициите и силите и може да работиме на развојот и да ја иницираме машинеријата на развојот на овој регион. За тоа ни се потребни бизнисмените, деловните луѓе кои ќе можат да ги резинсвестираат своите пари – рече Вучиќ.

Мораме да го оставиме минатото зад нас и да ја гледаме иднината, напредокот на животниот стандард на обичните граѓани, порача српскиот претседател.

– Ова не е насочено кон никого,  единствената цел е нашите граѓаните да живеат подобри, нешто што е свето. Секогаш ќе имаме противници на оваа идеја, кои не размислуваат на економијата на нешто долгорочно, кои размислуваат на следните избори и кои во сѐ бараат некој недостаток … Ние ќе се обидеме и ќе дадеме сѐ од себе. Едниот услов е довербата што ја имаме, а другиот е трите земји или влади да можат брзо да постигнат резултати, дали ќе можеме да ги надминеме сите слабости на нашата администрација или нема да можеме. Ако можеме да го сториме тоа на 1 јануари 2023 година – веќе нема да имаме граници меѓу нашите земји. Има граници, но нема граници за нашите граѓани. Одите од Белград до Тирана и никој нема да ве запре никаде – рече Вучиќ во своето обраќање на Форумот во Скопје.

Вучиќ изјави дека Србија му помогнала на македонскиот народ во 1963 година, кога Скопје го погоди катастрофалниот земјотрес.

– Немаме што друго да бараме од македонските граѓани, освен пријателство и братство. Не ни треба ни територија или да кажеме дека тоа е наш јазик. Нам ни е важно само да имаме најблиски и најдобри можни односи. Она што го правиме овде ќе направи големи работи за нашата земја, ако не успееме, барем ќе остане дека некој се обидел – за во следните година или две да можеме да поминеме низ нашите три земји, суверени и независни, да поминуваме без граници и да си помагаме едни на други во секое време – истакна Вучиќ.

Следната средба во рамки на иницијативата Вучиќ ја најави за два три месеци во Белград