НЕ ИЗМИСЛУВАЈТЕ, ВОЗАЧИТЕ НА ЈСП НЕ ВОЗАТ ДУПЛИ СМЕНИ! Возачи обвинуваат, ЈСП демантира
Возачи на ЈСП Скопје со кои разговараше Плусинфо тврдат дека возат по две смени едноподруго, за да ги „покријат“ линиите по кои сега не сообраќаат приватните компании. ЈСП Скопје тоа категорично го демантира и тврди дека одлично го менаџира јавниот превоз во ова кризно време.
Градоначалничката Данела Арсовска вели дека е задоволна како в.д. директорот во ЈСП Скопје, Александар Стојковски, ја менаџира кризата со јавниот превоз во Скопје. Но, состојбата на терен не е малку поинаква.
Често сме сведоци за доцнење на автобусите поради редуцираниот возен ред, за што говорат и поплаките на скопјани. Сега се појави уште еден проблем – премореноста на возачите во ЈСП. Поради зголемениот обем на работа, некои возачи се принудени да возат две смени една по друга.
– Навистина не знам до кога ќе трае ова лудило, зашто повеќе не се издржува. На пример, возам прва смена, го враќам автобусот и веднаш седнувам во друг и се вклучувам во сообраќај. Искрено, како јас, така и колегите, веќе сме преморени. Одговорноста е голема, а заморот може да нѐ совлада и да дојде до некоја непосакувана грешка – ни изјави возач во ЈСП Скопје, кој сакаше да остане анонимен.
Друг ни го потврди исказот на својот колега, но се пожали дека покрај тоа што работи по две смени, втората нема да им биде платена, туку ќе им биде даден слободен ден. А поради хаосот во јавниот сообраќај и слободниот ден може да пропадне.
– Нашата работа е многу стресна. И во една смена се соочуваме со бројни предизвици, па поради тоа мора да бидеме крајно внимателни и сконцентрирани. Сепак возиме луѓе во автобусите и не смееме да си дозволиме грешки. Раководството одлучи да се возат и по две смени една по друга. Тоа е навистина тешко. И не сакаат втората смена дополнително да ни ја платат, туку ни даваат слободни денови. Ако решиме да ги искористиме слободните денови, за да се одмориме, ќе нема кој да вози. Значи, ништо од тоа. Проблемот е што сега покриваме и дел од линиите што ги возеа приватните превозници – вака уште еден возач ја објасни состојбата во јавното претпријатие.
Го прашавме во ЈСП Скопје дали се точни информациите што ги добивме од возачите. Претпријатието вели дека станува збор за шпекулации.
– Наведените поплаки од возачите ги сметаме неосновани. Очигледно е дека станува збор за шпекулации – ни одговорија од ЈСП.
Исто така, прашавме како претпријатието се справува со зголемениот обем на работа и дали кај нив се чувствува проблемот, бидејќи приватните превозници не возат. Од ЈСП Скопје се пофалија дека одлично ја менаџираат кризата.
– ЈСП Скопје не чувствува никакви негативни последици по своето функционирање поради невозењето на приватниците. Тоа не се чувствува ниту во јавниот превоз. Впрочем, ЈСП Скопје ги „покри“ и ги опслужува и линиите на приватните превозници. Секојдневно 300 возила се вклучуваат во јавниот превоз – велат од претпријатието.
Како што претходно ни изјавија нашите соговорници кои тврдат дека возат по две смени, се претпоставува дека во ЈСП има недостиг на возачи. Но, од претпријатието негираат и велат дека нови вработувања се планираат за следната година.
– Во моментов во ЈСП Скопје има 656 возачи, а за в година планирано е вработување на педесетина нови возачи. Планот за вработувањата е согласно со годишниот план за вработување, кој се изработува за секоја година, што е наша законска должност, а не поради, како што велите, „новонастанатата ситуација“ со невозењето на приватните превозници – одговорија за Плусинфо од ЈСП Скопје.
Минатиот месец, поради доцнење на платата неколку дена по законскиот рок, возачите на ЈСП Скопје тие одлучија да не возат. Советот на Град Скопје донесе одлука веднаш да бидат пренаменети средства и на сметката на ЈСП Скопје беа уплатени 2 милиони евра, по што возачите зедоа плата. Потоа изби проблемот со приватните превозници, кои го обвинија јавното претпријатие дека им должи речиси 2 милиони евра и дека им нема исплатено средства од средината на август.
Претходно објавивме наводи дека во ЈСП Скопје нема резервни гуми, за што реагираа возачите. Најновата информација што ја објавивме вчера беше дека возилата на ЈСП се без гориво, а неколку беа оставени на улиците, па со канти им беше носена нафта за да се тргнат, а десетина возила беа повлечени во гаражите. ЈСП ја негираше и оваа информација.