Во Вухан учениците се враќаат на училиште, отворени туристички дестинации во Кина

Со маски и социјално дистанцирање, гимназијалците од завршните класови денеска се вратија во училиштата во Вухан, кинескиот град каде што започна епидемијата „kовид-19“ кон крајот на минатата година, по што се прошири низ целиот свет.

По четири месеци, во училишни униформи, тие се вратија со маски на лицето, а пред влез поминуваат низ инфрацрвени камери за да се детектира евентуална температура.

Локалните власти треба да ја одредат датата за враќање на учениците од другите класови и на основците.

Во останатите делови на Кина учениците се враќаат постепено по региони. Во метрополите Пекинг и Шангај само матурантите се вратија минатата недела, бидејќи треба да полагаат матура, која во целата земја е закажана за почетокот на јули, наместо еден месец порано.

Вухан и провинцијата Хубеј, кои беа најтешко погодени со вирусот, постепено се враќаат во нормала, откако на 8 април беше укинат карантинот во градот.

Во последните недели значително е намален бројот на новозаразени, а не е пријавен ниту еден смртен случај.

Вкупниот број заразени  во Кина изнесува 82.883, а 4.633 се починати.