ВО ЈУНИ ЌЕ СЕ ПЕНЗИОНИРАМ, А ТРЕНЕР НЕ СТАНУВАМ Горан Пандев е решен да ги закачи копачките на клин

Легендарниот македонски фудбалер Горан Пандев и активен член на италијанскиот прволигаш Џенова, во интервју за Кориере дело Спорт откри дека ја игра последната сезона во неговата кариера и дека во јуни идната година ќе стави крај на кариерата.

Напаѓачот и минатото лето размислуваше за пензија откако стави крај на репрезентативната кариера, но реши да одигра уште една сезона.

– Дефинитивно ова е мојата последна сезона. Во јуни одам во пензија. Продолжив уште една година поради луѓето, а ќе ми беше жал да ставев крај на кариерата пред празни трибини. Навивачите на Џенова секогаш ме поддржуваа и заслужуваат да им кажам благодарам, исто како што треба да му се заблагодарам и на поранешниот клупски претседател Прециози кој ме убеди да останам – рекол Пандев.

На прашањето дали можеби размислува да се впуши во тренерските води, легендарниот фудбалер одговорил дека нема такви амбиции.

– Не сум размислувал за иднината, но мислам дека нема да бидам тренер – истакнал Пандев.