Во САД извршена смртна казна по 17 години поради тројно убиство

Првата смртна казна на федерално ниво во САД по 17 години беше извршена денеска откако е егзекутиран човек осуден за тројно убиство, соопшти Министерството за правда.

Даниел Ли (47) беше егзекутиран со смртоносна инекција во сојузен затвор во Индијана, се вели во соопштението.

Во 1999 година, Даниел Ли беше прогласен за виновен за убиство на брачна двојка и нивната осумгодишна ќерка во Арканзас за време на грабеж.

Според американските медиуми, семејствата на жртвите се спротивставиле на егзекуцијата, па затоа поднеле тужба за нејзино запирање, наведувајќи го високиот ризик од корона инфекција.

Врховниот суд синоќа им даде зелено светло на федералните власти да ја извршат смртната казна, прва од 2003 година. Уште две егзекуции на федерално ниво се закажани за подоцна оваа недела, додека четвртата егзекуција е планирана за август.