ВО НОВАТА ГОДИНА КОСИ ГРИП ОД ТИПОТ А Пикот се очекува кон крајот на јануари и почетокот на февруари

Регистрирани се 1.725 случаи на заболени од грип или заболувања слични на грип во периодот од 29 декември и 4 јануари, што е за 2,2 пати повеќе споредено со претходната недела кога бројот на пријавени лица бил 771. Бројот на пријавени лица оваа недела споредено со истата недела минатата сезона кога бројот бил 331, е зголемен за 5,2 пати, а споредено со истата недела во последните 15 сезони, зголемувањето е за 38,7 проценти, покажуваат податоците на Институтот за јавно здравје.

Директорката на Институтот, Марија Андоновска денеска изјави дека согласно податоците, во Македонија има висок интензитет на вирусот на грип со очекување на натамошно зголемување во наредниот период. Според неа, ова не е ништо ново со оглед на периодот со празници, прослави и собирања и е нешто што е очекувано.

– Пикот на грип се очекува во втората половина на месецов и првата половина на февруари. Со враќањето на децата во училиште очекуваме дека бројот на заболени од грип може да биде зголемен. Пријавената инциденца е над неделната граница на средна активност на вирусот на грип на национално ниво. Во однос на возрасната дистрибуција 749 лица се на возраст меѓу 15 и 64 години, 618 се деца на возраст од пет до 14 години, 229 се деца на возраст до четири години и 129 се лица на возраст над 65 години. Највисока инциденца е регистрирана кај деца на возраст од пет до 14 години – рече д-р Андоновска.

Таа посочи дека пријавите за заболени ги добиле од 18 места и според добиените податоци најмногу заболени се регистрирани во Скопје – 716, во Тетово – 339, во Куманово – 150, во Велес – 109, во Штип – 60, во Дебар – 54, во Гостивар – 49, во Прилеп – 45, во Охрид – 44, во Битола – 40, во Струмица – 38, а во останатите градови како Кавадарци, Неготино, Струга, Демир Хисар, Виница, Македонски Брод, Радовиш бројот на заболени е помал од 30.

– Во Дебар се бележи многу висока активност на грипот, во Велес и во Тетово се бележи висока активност, средна активност е регистрирана во Скопје, Куманово и во Штип, а во десет единици се бележи сезонска регуларна активност, додека во две единици како Радовиш и Демир Хисар се бележи многу ниска активност на вирусот на грип. Во досегашниот тек од почетокот на сезоната не се регистрирани починати лица кои асоцираат на грип. Се забележува значително зголемување на бројот и инциденцата на заболувања слични на грип на неделно ниво. Во текот на првата недела од годинава за првпат во сезоната е регистрирана средна активност на грипот на национално ниво – рече д-р Андоновска.

Во однос на општите мерки, таа апелира тие кои не се заболени да избегнуваат собири, престој во простории, молови каде има голем број луѓе, да се избегнува контакт со заболени или луѓе со симптоми на кивање и кашлање, често да се мијат раце со сапун и вода, да се проветруваат просториите, да се почитуваат здрави животни стилови, редовно пиење вода, да се консумира лесна храна, витамини и минерали.

– Кај оние кај кои е констатиран грип препораките е да се јават кај својот матичен доктор, да останат дома, да не се оди на работа, да не се носат децата во училиште, не само заради пренесување на вирусот, ова е важно и за болните, да не ги изложуваме ни децата ни возрасните. Доколку е докажано дека имаат грип треба да бидат во домашни услови, да мируваат, да примаат симптоматска терапија препишана од матичен лекар. Многу е важно доколку се појават симптоми да се остане дома. Кај ризичните категории граѓани, над 65 години, кај децата, бремените жени, хронично болните доколку има влошување на состојбата да се јават кај својот матичен лекар – потенцира д-р Андоновска.

Одговарајќи на новинарски прашања таа рече дека годинава циркулира вирус на грип од типот А и дека како Институт за јавно здравје ќе продолжат да ја следат состојбата во однос на тоа дали има пораст на заболени од грип, а доколку оценат дека бројките се премногу високи може да дадат како препорака да се донесе некаква мерка, како на пример одлагање на почетокот на второто полугодие.

Според податоците на ИЈЗ, во однос на сезоната 2025/2026 генерално значи од почетокот на сезоната до денеска, бројот на случаи на грип и заболувања слични на грип изнесува 3.825. Споредено со истиот овој период минатата сезона, кога бројот бил 1.335, бројот на пријавени случаи е зголемен за 2,8 пати, а во однос на моделот од последните 15 сезони вкупно се регистрира зголемување од 20,6 проценти.