Во нападот врз болницата во Кабул загинале 12 мајки и сестри и две бебиња

Во вчерашниот напад врз болницата во северен Кабул, каде „Лекари без граници“ водат породилиште, биле убиени 12 мајки и медицински сестри и две бебиња, соопштија авганистанските власти.

Во нападот има и најмалку 15 други повредени лица, меѓу кои и неколку деца.

Нападот го извршиле неколку вооружени лица, а талибанците негираа дека стојат зад нападот, за што  сѐ уште никој не ја презеде одговорноста.

Според официјалните лица, три лица во полициска униформа упаднале во болницата и почнале да пукаат и да фрлаат бомби.

– Десетици лица беа евакуирани од болницата од страна на безбедносните сили, вклучително и жени и деца – изјави портпаролот на министерот за внатрешни работи.

Нападнатата болница, што има капацитет од 100 кревети, се наоѓа во еден од најсиромашните делови на Кабул.