ВО ИТАЛИЈА Е УАПСЕН СРБИН СО 16 ЛАЖНИ ИДЕНТИТЕТИ „Пинк пантерот“ речиси деценија успешно се криел од полицијата

Српскиот државјанин Бојан Марковиќ (38), кој е поврзан со меѓународната банда крадци „Пинк Пантер“, е уапсен во средата во Италија по 11 години криење од локалната полиција и од потерницата. Тој е осомничен дека извршил бројни грабежи во Италија, а со години успешно се криел зад дури 16 лажни идентитети!

Според италијанскиот портал „Ottopagine.it“, Марковиќ бил уапсен од карабинерите на Територијалниот оддел Мондрагоне. Тие објаснија и како дошле до српскиот бегалец.

– Инспекторите му влегоа во трага на Марковиќ по долги и макотрпни истраги на инспекторите за кражби во куќи и златарници – пишуваат локалните медиуми.

Меѓутоа, Србинот со години вешто се спротивставувал на апсењето бидејќи се криел зад лажни идентитети.

– Истрагата утврдила дека Србинот користел дури 16 лажни идентитети и на овој начин секој пат успевал да биде чекор понапред од полицијата. Често користел фиктивни имиња, со лажни места и датуми на раѓање. Тој користел и имиња слични на неговото, но секогаш доволно различни за да ги збуни полицајците кога, на пример, случајно го претресувале на улица – пренесува порталот „Ottopagine.it“.

Марковиќ во средата бил запрен од карабинерите на сред улица, а потоа по деталната проверка на неговите лични податоци утврдиле дека тој всушност е бегалец кој го барале повеќе од една деценија.

– Србинот е осуден на затворска казна од девет години, осум месеци и 27 дена, како и на парична казна од 3.200 евра, сето тоа поради бројни кривични дела, кои главно биле грабежи на луксузни станови и златарници. Тој е обвинет за кривични дела против имотот што ги извршил во провинциите Авелино, Касерта, Киети, Пезаро Урбино, Салерно и Сасари – наведува италијанскиот портал.