ВО ЕУ И ВО НАТО СЕ ОДВИВААТ ПРОЦЕСИ ЗА МАКЕДОНИЈА БЕЗ УЧЕСТВО НА БУГАРИЈА Должни сме да формираме влада и да застанеме цврсто на нашите позиции
Според лидерот на ГЕРБ, Бојко Борисов, Бугарија е должна да успее да формира редовна влада поради меѓународната ситуација.
Лидерот на ГЕРБ, Бојко Борисов изјави дека преговорите за мнозинство и за формирање бугарска влада се одвиваат добро, а колку помалку се зборува, толку се поголеми шансите за успех.
Борисов додаде дека откако ќе се подготви основната рамка за програмата, во разговорите ќе биде вклучена и партијата Има таков народ (ИТН).
Според лидерот на ГЕРБ, Бугарија е должна да успее да формира редовна влада поради меѓународната ситуација.
Борисов најави и дека вчера разговарал со претседателот на Европскиот совет, Антонио Кошта и при разговорот стана јасно дека во последните 2-3 години и во ЕУ и во НАТО има процеси кои се однесуваат на Република Македонија, кои се развиваат без учество на Бугарија.
– Вчера имав долг разговор со претседателот на Европскиот совет, Антонио Кошта, добар пријател. Од разговорот разбрав дека во текот на овие години во Брисел, во нашите партнерски земји во НАТО се одвиваа многу процеси за С.Македонија и се изгуби многу време. Бев изненаден од објаснувањата што требаше да ги дадам. Значи ние сме должни да формираме влада и да застанеме цврсто на нашите позиции – изјави поранешниот бугарски премиер во изјава за бугарските медиуми.
Македонската влада, пак, смета дека треба да се почека Бугарија да добие стабилна политичка влада и да се лобира за евентурално ново решение. Челници на владејачката ВМРО-ДПМНЕ неколкупати претходно изјавуваа дека планот за одложени уставни измени звучи логичен и наидува на разбирање кај голем дел од соговорниците во ЕУ.
Неочекуван важен гостин во Софија
Унгарскиот премиер Виктор Орбан ќе престојува во ненадејна посета на Бугарија, јави БГНЕС.
Според првичните информации, унгарскиот гостин се очекува да има разговори со претседателот Румен Радев и лидерот на ГЕРБ-СДС Бојко Борисов.
Една од најверојатните теми ќе биде транзитот на руски природен гас преку „Балканскиот тек“ за земјите од ЕУ, вклучително и Унгарија. Плаќањето на овие давачки се врши преку Гаспромбанк, на која САД воведоа санкции.
Унгарскиот премиер, по формирањето на новата македонска влада на чело со премиерот Христијан Мицкоски, при посетата на Охрид во септември се понуди да посредува меѓу Македонија и Бугарија за решавање на несогласувањата и за деблокирање на македонските евроинтеграции, но властите во Бугарија ја одбија оваа понуда на Орбан.
Засега нема информации дали и ова прашање ќе биде на маса при разговорите со бугарскиот претседател Радев и со лидерот на победничката партија на октомвриските избори Бојко Борисов за кој не е извесно дека ќе биде премиер на новата бугарска влада за која во моментов течат партиски преговори.