ВМРО – ДПМНЕ: Заеви се фатени во масовен поткуп, Вице им се заканувал на инспекторите ВИДЕО
Зоран и Вице Заев се фатени во поткуп. Вице притискал во МВР и се заканувал на инспектори за ослободување на луѓето кои ги пакувале пакетите, тврди ВМРО – ДППМНЕ и бара сите што го прекршиле законот и кои што се приведени да одговараат, откако зачера полицијата влезе во магацини во Струмица каде се пакувале пакети донација од семејството Заеви.
Министерството за внатрешни работи претходно информираше дека полицијата интервенирала поради непочитување на владината одлука за движење и во магацинот во Струмица на 29 април во 22, 30 часот затекнале 11 луѓе, од кои дел имале дозволи за движење, издадени од хуманитарно здружение.
Портпартолот на ВМРО-ДПМНЕ, Димче Арсовски, вели дека лицата кои биле приведени во Струмица се блиски до Зоран и Вице Заеви, а работеле доцна во ноќта, до полноќ, подготвувајќи пакети, како што тврди, брендирани од СДСМ. Според Арсовски власта тие пакети ги дели за масовен поткуп на граѓаните.
– Шерифското однесување на семејството Заеви, кои мислат дека се над законот и дека поседуваат сè и секого во државава, стигнало дотаму што Вице Заев лично отиде во полиција да се заканува врз полицајците и на најшерифски начин да сака да го прикрие случајот. Е па другар Вице Заев, за жал, мораме да те разочараме, заврши тоа време кога можевте да криете и прикривате полициски случаи да не излегуваат во јавност. Ова најдрско и најшерифско однесување на кршење на законите мора да заврши еднаш засекогаш. Ништо повеќе не е семејството Заеви од кој било друг граѓанин во Република Македонија кој ги почитува законите на својата држава – порача Арсовски.
Тој нагласи дека сите кои го прекршиле законот вчера и коишто се приведени треба да одговараат, вклучително и Вице Заев, доколку го прекршил полицискиот час, бидејќи отишол да ги извади оние кои биле приведени и да се обиде да го прикрие случајот.
– Инаку лицата кои го прекршиле законот и ги подготвувале овие пакети, целата јавност знае дека овие пакети се за масовен поткуп на граѓани кои треба да гласаат на изборите кога и да се одржат. Лицемерите од СДСМ ја потценуваат интелигенцијата на граѓаните и под превезот на некакви си хуманитарни побуди, вршат масовен изборен поткуп. Она што е најсмешно и најлицемерно е дека според сведоштвата на луѓе дека во пакетите кои ги дели СДСМ нема ниту еден, ама баш ниту еден македонски производ, сите кои што се ставаат внатре се увозни. Ете толку треба да се знае за лицемерието на СДСМ и на семејството Заеви. Грубото кршење на законите мора да се санкционира. Заврши времето на шерифување на семејството Заеви – додаде Арсовски.
Полицијата работи на целосно расчистување на овој слуај во координација со струмичкото обвинителство.