ВМРО-ДПМНЕ утре на протести со возила против криминалот, корупцијата, неправдите и прогонот

ВМРО-ДПМНЕ утре организира протести со возила во Скопје, Велес, Охрид, Куманово, Прилеп, Штип и во Битола со почеток во 18.30 часот, најави партијата.

Протестот со возила на територија на Скопје ќе почне од СЦ Јане Сандански до владата.

– Македонија стана земја на криминалци, мафијаши на власт и неправда. Има за врхушката на власт, а нема за народот. Прогонот на политички неистомисленици стана секојдневие од страна на власта, која пак го прикрива стравот од казната која им следи од народот. Криминалот и корупцијата на власта се сериозни проблеми со кои се соочува државата, а вмешаноста во корупциски скандали и афери на луѓе од власта и блиски до Заев стана нормалност. СДСМ и Заев мора да заминат на темната страна на историјата, а Македонија мора да биде правна држава во која ќе владеат законите подеднакво за сите – велат од ВМРО-ДПМНЕ.

Партијата ги повикува сите граѓани да се приклучат на протестот против криминалот, корупцијата, неправдите и прогонот.