ВМРО-ДПМНЕ: Телевизија Телма под дејство на Заев ја цензурира опозицијата
Опозиционата партија потсетува дека уредништвото на Телма треба да знае дека освен бизнис интереси на компанијата која ги поседува постои и јавен интерес кој телевизијата треба да го застапува, а тој налага избалансирано преставување.
ВМРО-ДПМНЕ денеска обвини дека телевизија Телма која има национална концесија немаше никакво известување за активностите на опозицијата.
„Цензурата на Телма и мракот кој Зоран Заев го прави за опозициските активности продолжува што укажува дека Владата на Заев се брани не со аргументи туку со тоа што реши да ја замолкне опозицијата.Уредништвото на Телма треба да знае дека освен бизнис интереси на компанијата која ги поседува постои и јавен интерес кој телевизијата треба да го застапува, а тој налага избалансирано преставување.Дека телевизијата известува неизбалансирано во корист на владата со целосно игнорирање на активностите на ВМРО-ДПМНЕ потврдува и извештајот на АВМУ каде се констатира таквата цензура“ , се наведува во соопштението на ВМРО-ДПМНЕ.
Од партијата додаваат дека премиерот Заев ги држи во заложништво дел од медиумите.
„Цензорот Заев во заложништво ги држи дел од медиумите уценувајќи ги со бизнис и политички интереси. Таквиот мрак треба да ја сокрие катастрофата во здравството и економијата.Ги охрабруваме новинарите да ја штитат слободата и својата независност“ се наведува во соопштението.