ВМРО-ДПМНЕ ПРАШУВА Што бараат вработени во АНБ на местото на сообраќајката, кој го штити Кичеец?

Учесник во денешната сообраќајка на патот Скопје – Охрид пред Стража е и Зоран Милески Кичеец, лице кое моментно треба да се наоѓа во затвор.Согласно информации од медиумите и фотографиите кои се најдоа во дел од нив, покажуваат дека Кичеец наместо во затвор се шета  на слобода низ улиците на државатака, истакна на попладневната конференција за печат Марија Митева, портпарол на ВМРО-ДПМНЕ.

– Во сообраќајката која според досегашните информации резултирала со смртни последици за две лице и шест повредени, учествувале три возила, меѓу кои и возилото на Зоран Милески Кичеец. Од фотографите во медиумите јасно се гледа Кичеец е дел од сообраќајната незгода. Кичеец е осуден во предметот „Рекет“, целата македонска јавност го виде како ги носи рекетираните милиони во „Луј Витон“ ташна. Кичеец е човекот за кој слушнавме и дека го организирал рекетот врз Миодраг Давидовиќ Дака во случајот ШИК Јелак, каде на контроверзниот српски бизнисмен му се земени 300.000 евра според негови зборови кои се слушнаа од снимките пуштени во јавноста. Кичеец омилениот рекетар на власта, денеска е и омилен осуденик, наместо во затвор тој е на слобода – рече таа.

Митева истакна дека според информациите кои ги поседуваат, на местото на настанот биле видени и лица дел од шестата управа, а цел ден се вршеле притисоци врз лица кои биле сведоци на настанот и врз медиуми да не изнесуваат информации за сообраќајката.

– Се вршат притисоци за прикривање ова што се случило денес. Власта треба да одговори на јавноста зошто Кичеец е пуштен на слобода и што бараат лица вработени во АНБ на лице место на настанот? До кога врвот на власта ќе штити криминалци – прашуваат од ВМРО-ДПМНЕ.