ВМРО-ДПМНЕ: Образованието е во хаос, нема програми и учебници, а онлајн платформата не е готова

На само две недели пред почетокот на новата учебна година на први октомври повторно хаос во образованието. Училиштата неемаат добиено скратена програма  за да можат наставниците да се подготват, а платформата  за онлајн настава сѐ уште не е подготвена. Нема печатени и ниту електронски учебници, а родителите учениците и наставниците се во паника,  велат од ВМРО-ДПМНЕ.

– Во август директорите на училиштата, назначени од Владата на СДСМ и ДУИ ги викаа наставниците итно од годишен одмор, за да го креираат годишниот училишен план, за сега да го поправаат. Се покажа дека дел од училиштата го предале, а дел не, но поважно од тоа е што тој поради скратување на училишната година за 138 училишна часа, сега треба да се преправа – велат оттаму.

Од партијата потсетуваат дека платформата за онлајн настава сѐ уште се изготвува, а наставниците, родителите и учениците се речиси во паника поради нејзино непознавање и потребата од обука.

– Колку за информација во руралните средини и подрачни училишта наставниците им ја инсталираат платформата на учениците при што две до три деца користат еден компјутер. Интернет врските во огромен дел од училиштата се лоши и во огромен дел од училиштата наставниците немаат компјутери, лаптопи, па дури ни таблети.Сосема е јасно дека 30.000 компјутери не може да се набават за 30 дена – велат од ВМРО-ДПМНЕ.

И покрај прредупредувањата од наша страна, велат од партијата,  немаше кој да нѝ слушне, затоа што во тек на летото се беше поважно од образованието.

– Од заштедите што училиштата ги остварија во претходното полугодие, директорите на СДСМ и ДУИ наместо да набават опрема, да го појачат интернетот, да набават средства за хигиена, фарбаа, менуваа врати, поправаа огради, поправаа фасади и менуваа сијалици.Учебната година можеби и ќе почне на први или на петти октомври, ама учењето не, јасно е како бел ден – велат од ВМРО-ДПМНЕ.