ВМРО-ДПМНЕ ОБЕЗБЕДИ ДОБРИ ПОНУДИ ЗА МАЗУТ И ЗА ГАС Повелете, преговарајте и заштедете 300 милиони евра!

ВМРО-ДПМНЕ обезбедила индицирани понуди за набавка на 200.000 тони за ТЕЦ Неготино и 250 милиони кубни метри гас за гасната централа ТЕ-ТО, со кои значително ќе се ублажи енергетската криза во Македонија и ќе се заштедат најмалку 300 милиони евра.

Ова на брифинг со новинарите денеска го соопшти лидерот на опозициската партија, Христијан Мицкоски, повикувајќи ги Владата и бизнис заедницата да ги искористат ресурсите што се на располагање и да реагираат брзо, уште оваа недела.

Според добиените индикации, мазутот за ТЕЦ Неготино може да се набави по поволна цена од околу 40 милиони евра, што ќе овозможи централата да произведува струја по цена од 150 до 195 евра за мегаватчас, најмалку двојно пониска од сегашната.

– Нашиот концепт е струјата од ТЕЦ Неготино да се користи за домаќинствата за да се избегне драстично поскапување на струјата и да се остварат заштеди – појасни Мицкосли.

Според концептот на ВМРО-ДПМНЕ, недостигот од струја за компаниите кои се снабдуваат на отворениот пазар треба да се надомести со набавка на 250 милиони кубни метри гас од западни компании кои тргуваат со Гаспром.

– Се обративме до наши пријатели во Западна Европа и добивме индикативни понуди. Ако се прифатат, ТЕ-ТО ќе произведува струја по цена по 200 евра за мегаватчас. Тоа е прифатлива цена за бизнисот, а скопјани ќе го решат проблемот со парното греење – објасни Мицкоски.

ВМРО-ДПМНЕ ги става на располагање своите контакти на Владата и на бизнис заедницата.

– Немам намера да преговарам. Тука се индикативните понуди, повелете преговарајте. Реагирајте брзо, бидејќи ако задоцниме, ќе се соочиме со уште поголеми проблеми – апелираше Мицкоски.

ВМРО-ДПМНЕ е во комуникација со стопанските комори и со бизнис-заедницата, но засега не и со Владата.