ВМРО-ДПМНЕ: Мерките да ги користат и компаниите кои зеле субвенции!
Епидемијата зазема огромни размери, а Владата на СДСМ не презема мерки да се сопрат здравствената и економската криза, обвини ВМРО-ДПМНЕ.
„Македонија е на колена. Масовно тестирање нема, а вирусот коси без соодветни реакции од страна на надлежните. Бројот на починати и заболени секојдневно се зголемува, а институциите сѐ потешко се справуваат со ситуацијата. Нема соодветен менаџмент, ниту превентивно делување. Неспособноста на оваа Влада доведе до тоа да околу 15.000 граѓани од угостителскиот сектор да останат без работа. Последните анкети и статистики велат дека над 160.000 граѓани се отпуштени од работа како резултат на економската криза, а за тоа директно се виновни СДСМ и Владата“, велат од партијата.
За да се помогне во решавање на економската криза ВМРО-ДПМНЕ под итно бара од Владата:
– да им помогне на компаниите од угостителскиот сектор со 50% од бруто платата која ја исплаќаат за секој вработен за март, април и за мај.
– кириите за угостителските објекти да бидат ослободени од плаќање на кирија за март, април и за мај.
– да се најде институционален начин, угостителите кои имаат под закуп објекти кај приватни закуподавачи да плаќаат барем половина од месечната рата односно кирија, односно 50%, за месеците март, април и за мај. За оваа мерка ги замолуваме за разбирање и закуподавачите поради сведениот обем на работа на нула.
– сите угостителски објекти да бидат целосно ослободени од плаќањето на закупот за летни тераси за целата летна сезона 2020.
– јавните давачки кон државата, тука влегуваат ДДВ, аконтации за ДДВ, данок на добивка и други давачки, да бидат одложени до 10-ти месец 2020 година, односно до октомври и потоа да се наплаќаат на рати без затезни камати од страна на државата.
– режиските трошоци за угостителските објекти, трошоци за струја, вода и останатите, кои ќе доспеат за март, април и за мај, да се одложат за плаќање од 10-ти месец 2020, односно да се плаќаат од октомври на рати.
– да се намалат критериумите за аплицирање на мерки за помош од државата за угостителите, бидејќи вака како што се условите само 10% од угостителските компании можат да ги искористат. Тука вклучително бараме мерките да може да ги користат и оние компании кои користат субвенции од АВРМ.
– веднаш треба да се интервенира со одлука за вадење на неопходните документи за аплицирање за мерките, да се вадат во најбрз можен рок електронски, без чекање по шалтери и сето тоа да биде на трошок на државата, односно бесплатно за компаниите од угостителскиот сектор.