ВМРО-ДПМНЕ: Кластерите се нижат, бројот на заболени расте, а власта размислува како да ги полни касите на фирмите на Заеви

Со 6,073 случаи на заразени од Ковид 19 на милион жители, Македонија е невидена катастрофа во целиот регион. Бројката од 259 смртни случаи на милион жители говори за поразителните политики на власта и неодговорноста кон сопственото население, обвинува ВМРО-ДПМНЕ.

– На власта не и е грижа што во Македонија повторно има 140 новозаразени вчера, ниту им е грижа за 539-те смртни случаи од почетокот на пандемијата. Страшни и црни се бројките од 12.653 заболени граѓани од коронавирусот. Ова говори за неодговорноста во справувањето со коронавирусот, Зоран  Заев и Венко Филипче ги оставија луѓето сами да се снаоѓаат со оваа зараза – велат од партијата.

Оттаму додаваат дека од лошиот третман по клиниките, недоволната грижа, несоодветните услови,
немањето на кадар по болниците, препраќањето на пациенти кои имаат тешки симптоми дома да се лекуваат, како и несоодветните превземени мерки, до несправувањето со кластерите резултираше со вакви поразителни рекордни бројки.

– Токму министерот Филипче на прес конференциите велеше дека бројката на заболени се очекува да биде до 2.500 граѓани, а сега за рекорните 12.653 заболени граѓани власта молчи и веројатно очекува вирусот да го снема сам од себе- велат од ВМРО-ДПМНЕ.

Според ВМРО-ДПМНЕ, оваа влада покажала дека здравствениот систем и економијата се црна дупка во која живее македонскиот граѓанин. Системот не функционира, капацитети нема доволно, а нема ниту способност да се помогне на граѓаните чии разочарувања се огромни.

– Кластерите се нижат, порастот на заболени е непрестанат неколку месеци по ред, а власта изгледа не сака да се справи со вирусот, како што не сака да се справи со економските проблеми и со образованието. Единствениот интерес на Заев и СДСМ се парите како да завршат во фирмите на фамилијата, додека расне бројот на починати, а Македонија срамно пробива рекорди по број на заразени – велат од ВМРО-ДПМНЕ..