ВМРО-ДПМНЕ: Итно да се прогласи кризна состојба во Куманово и во Прилеп

Владата на СДСМ задоцни со мерките за превенција од коронавирус. Растот на нови случаи веќе се мери во троцифрени бројки. Ненавремено преземените мерки доведоа до нови жаришта во Куманово и Прилеп, рече Дарко Костовски од ВМРО-ДПМНЕ на денешната прес-конференција.

– Ситуацијата во овие два града излегува од контрола. Заразен е кризниот штаб во Куманово, заразени се лекари, а власта не презема ефикасни мерки. Владејачката партија се заплеткува во меѓусебни кавги и пресметки на сметка на народот. Бараме итно прогласување на кризна состојба во Куманово и Прилеп. За заштитата на скоро 200.000 луѓе се работи. Здравјето пред сè. Наместо гол популизам потребни се реални мерки и за здравјето на граѓаните и за економијата. СДСМ остави над 140.000 работници на улица, а сега им дава поткуп кој го нарекува хуманитарна помош за да се слика со нив. Зоран Заев си тера политичка кампања во ек на пандемија, и кога сите страдаат, тој сака да профитира. Наводната хуманитарна помош што ја делат не е ништо друго освен поткуп. Затоа и СДСМ молчи и не сака да ги покаже фактурите со кои е купена помошта, ниту кој ја купил. Од однесувањето на СДСМ имаме сомнежи за голем криминал со хуманитарна помош, под чиј превез се прави огромен криминален поткуп. Тоа е потценување на народот. Граѓаните имаат потреба од мерки кои ќе ги спасат  нивните работни места, а намирници сами ќе си купат – рече Костовски.

Тој ги повика Антикорупциска и Јавното обвинителство да го испитаат случајот со поткуп и да реагираат согласно законите.

– Овој политички поткуп во функција на нивната изборна кампања мора да се казни. Народот умира од корона, а СДСМ тера кампања. Наводната хуманитарна помош на СДСМ е само гол популизам, кој одамна е прочитан – рече Костовски.