ВЛАСТА ГО КОЧИ ПРЕДЛОЖЕНИОТ ЗАКОН ЗА ПРОДОЛЖЕНА ВАЖНОСТ НА ПАСОШИТЕ Кривично треба да одговараат за тоа што ги заробија граѓаните

Очекувам дека Оливер Спасовски ќе сноси одговорност за тоа што го има направено како надлежен ресорен министер во МВР, дали тоа ќе биде како резултат на оваа кривична пријава сега или на некоја кривична пријава или кривични пријави набрзо од денес, тоа ќе видиме. Немам голема доверба во октроираното обвинителство и судство, но да видиме, истакна претседателот на ВМРО-ДПМНЕ, Христијан Мицкоски во вечерашното гостување во емисијата Клик Плус на ТВ 21.

Мицкоски истакна дека новиот јавен обвинител  изгласан од сегашното владејачко мнозинство, преку поднесената кривичната пријава за Оливер Спасовски треба да покаже дали ќе продолжи да биде слеп послушник на политиките на раководството на СДСМ и ДУИ, или ќе се одважи.

– Па нов обвинител кое што старото мнозинство си го избра. Од тоа што можам да видам, гледам дека бил прилично лојален изминатиот период на ова старо мнозинство кое ќе биде за неколку месеци. Но, ајде да дадеме шанса па да видиме дали ќе го продолжи трендот на неговиот претходник да биде безгласна буква и слеп послушник на политиките на раководството на СДСМ и ДУИ, или ќе се одважи. И еве му шанса сега преку оваа кривична пријава за Оливер Спасовски да покаже дека во Македонија можат да владеат законите и дека може да се врати вербата и довербата во институциите – истакна Мицкоски.

Мицкоски додаде дека ВМРО-ДПМНЕ нема вина за хаосот со патните документи, бидејќи и покрај активната блокада од страна на пратеничката група на ВМРО-ДПМНЕ, владејачкото мнозинство помина многу закони со злоупотреба на европското знаменце, при што доколку сакаа ќе ги изгласаа и измените во законите за лични документи.

– Не би се сложил дека активната блокада е пречка доколку некој сакаше тоа да го направи, бидејќи тие поминаа многу закони во парламентот на брза трака со злоупотреба на европското знаменце. Така што доколку сакаа или пак ако некој мислеше и имаше стратешка цел тоа да се случи тоа и ќе го направеа. Но тие за жал, тоа не го направија. Не поради тоа што покажуваа пркос, туку едноставно затоа што беа зафатени со пљачкање и разграбување на државата. И нормално фокусот беше ВМРО-ДПМНЕ и јас изминатите години, наместо да си ја работат работата за тоа за кое што се платени и надлежни. Така што доколку постоеше искрена желба кај овие европејци, тогаш наместо да се однесуваат како мафијаши во крими филмовите, тие можеа да си ја завршат работата за која што се платени – смеат лидерот на ВМРО-ДПМНЕ.

Мицкоски го повика мнозинството на власта да го поддржат и изгласаат законот кој го предложи пратеничката група на ВМРО-ДПМНЕ за продолжена важност за пасошите.

– Доколку постои желба и во актуелното мнозинство сега во парламентот ќе се надмине овој проблем, односно ќе се поддржи законот кој што го предложи пратеничката група на ВМРО-ДПМНЕ со кој што ги третира патните документи и ќе биде продолжено времетраењето на важноста на пасошите – посочи Мицкоски.

Претседателот на ВМРО-ДПМНЕ потсети на изјавите на тогашниот портпарол на владата на СДСМ и ДУИ, Миле Бошњаковски, кој на прес конференција рекол дека нема да има вонредна процедура за вадење на лични документи односно како ќе истекува рокот на важење на старите документи така тие ќе се обновуваат, но како што рече тој брутално ги излажал граѓаните.

– Ако се вратите наназад во времето, кога оној капитулантски договор го потпишуваше оваа влада и ако ги слушнете изјавите на тогашниот портпарол на владата, Бошњаковски, сега прв соработник на Стево Пендаровски, ќе ви стане јасно дека тој ја убедува јавноста дека практично нема да има вонредна процедура за вадење на лични документи и замена на иститд поради условите кои што се содржани во тој капитулантски договор кој што оваа влада го потпиша. Тој тогаш вели дека како ќе истекува рокот на важење на старите документи така тие ќе се обновуваат. Значи брутално лажење. Замислете тоа доаѓа од устата на тогашниот портпарол на владата. Тоа значи дека кога портпарол кажува став тој го кажува ставот на целата влада – нагласи Мицкоски и додаде дека реалноста денеска е дека се најмалку две години за да бидат заменети сите пасоши кои до овој момент се во сопственост на македонските граѓани.

-И каква е денеска реалноста? Денеска реалноста е дека ние физички и математички во овој момент во идеални услови без да има дефект во работењето на уредите кои ги печатат пасошите, ќе бидат потребни најмалку година и пол до две години за да бидат издадени сите пасоши кои до овој момент се во сопственост на македонските граѓани – истакна Мицкоски.

На прашањето што ќе направат со патните исправи, Мицкоски рече дека ќе се изгласа закон со кој ќе се продолжи важноста на пасошите, ако не во овој тогаш во следниот парламентарен состав.

– Многу едноставно. Има закон во парламентот, ако сега не се изгласа, следното мнозинство ќе поднесе ист таков закон со кој што ќе се продолжи важноста на пасошите – рече претседателот на ВМРО-ДПМНЕ.