ВЛАДАТА СО СТАКЛЕНИ НОЗЕ Зошто СДСМ бега од клучните ресори?

СДСМ и ДУИ изгласаа влада со само 62 пратеници, а недели наназад зборуваат како имаат стабилно мнозинство. Ова ли е тоа стабилно мнозинство? Мнозинството и владата повторно се на стаклени нозе, нестабилни и нефункционални, реагираше пратеникот на опозициската ВМРО-ДПМНЕ, Драган Ковачки.

– Старо-новата влада од истрошени и компромитирани кадри на чело со Димитар Ковачевски, нема никаков легитимитет, капацитет и авторитет да ја води, а уште помалку да ја извади државата од вкупно 4-те прогласени кризни состојби на територија на Македонија, како и од блокадата на нашиот пат кон ЕУ.  За 4-те кризни состојби и генерално лошата состојба во државата, одговорност има и денешниот нов премиер, кој како досегашен заменик министер за финансии и близок соработник на Зоран Заев, учествувал во креирањето на погрешните политики кои во последните 5 години направија пустош на полето на економијата, образованието, здравството, а кризниот менаџмент го сведоа на имровизации.  Старо-новата влада нема народен легитимитет и таа е производ на тешкиот пораз на СДСМ на локалните избори. Таа е континуитет на криминалот, корупцијата и неспособноста – рече Ковачки на денешната прес-конференција.

Во делот на капацитетот, додаде тој, погледнете го составот на Владата и ќе видите дека СДСМ, бега од клучните ресори на кои во моментов паѓа најголемиот товар во менаџирањето со кризите.

– Енергетската криза ќе ни ја менаџираат кадри на ДУИ и на Алтернатива, здравствената ќе ни ја менаџира кадар на Алтернатива, а со блокадата во ЕУ интеграциите продолжува да менаџира Бујар Османи. СДСМ знае дека на сите овие полиња потфрлиле и затоа бегаат. Главната алка во кризниот менаџмент, односно Дирекцијата за заштита и спасување, продолжува да ја води ДУИ. Со бегањето на СДСМ од клучните ресори, менторот Заев кој што ја состави Владата, на многу перфиден начин преку Ковачевски се обидува да ја поларизира состојбата и да ја втурне државата во дополнителна неизвесност. Оваа Влада има за цел да го заштити Заев и неговите криминали, затоа Оливер Спасовски е министер за внатрешни работи. Оливер Спасовски кој веќе седма година го води МВР, наместо да се бори со криминалот и насилството, тој институционално ги практикува и двете. Тој дозволи името на Вице Заев да исчезне од кривична пријава за рекет во РЕК Битола, тој не го повика Трајче Заев на информативен разговор кога неговиот возач беше фатен во шверц на дрога, тој е кумот на издавањето 215 пасоши на белосветски криминалци. А неговиот шеф на кабинет и најблиска соработничка која учествуваше во сите овие процеси, г-ѓата Славјанка Петровска, сега треба да ја води одбраната – рече Ковачки.

Тој посочи и дека Љупчо Николовски кој ги уништил тутунарите со дозволувањето на увоз на тутун, а додека беше вицепремиер се прославил со заплената на една кутија путер, не е ништо друго туку продолжена рака на Заев.

– Евроинтеграциите ќе ги води Маричиќ, кој уште не разреши кој прислушкуваше во ЈО, кој вршеше притисоци врз судии и обвинители и кој нема ниту една успешна реформа. Со министерството за транспорт и врски ќе раководи Благој Бочварски, кој никој не знае дека е министер, зашто ништо нема направено. Со оваа Влада без легитимитет, капацитет и авторитет, Македонија ќе продолжи да тоне. Токму затоа, на Македонија ѝ се потребни избори кои ќе ја рефлектираат волјата на народот, а Владата ќе биде легитимна и одлучна во борбата со криминалот и корупцијата и ќе донесе нова иднина за сите граѓани на државата – истакна Ковачки.