ВЛАДАТА Е ВО ЦАЈТНОТ СО ФРАНЦУСКИОТ ПРЕДЛОГ Брза да го потпише пред да заминат на одмор европските комесари?

Владата и Собранието во забрзана процедура ќе го прифатат т.н. француски предлог, со кој се формулира преговарачката рамка на Македонија со Европската Унија (ЕУ), а во наредните денови ќе се потпише и протоколот со Бугарија, за целата работа да се заврши најдоцна до 20 јули, бидејќи потоа започнуваат летните одмори во Европската комисија (ЕК), па нема да може да се одржи меѓувладина седница, на која е замислено земјава да добие датум за почнување на преговорите со Унијата.

Ова за Плусинфо го тврдат извори од опозицијата, кои претпоставуваат дека за прифаќањето на францускиот предлог, во Собранието на Република Македонија ќе гласаат околу 70 пратеници. Тука се мисли на гласовите на СДСМ, ДУИ, Алтернатива, БЕСА и на Алијанса на Албанците.

Според нашите извори, седницата во Собранието ќе биде закажана во наредните денови, а расправата ќе трае најмногу три дена. Теоретски би можело сè да биде завршено до сабота, иако во исто време во заканодованиот дом трае расправата за Буџетот. Сепак, нашите извори тврдат дека претседателот на Собранието, Талат Џафери, може да пронајде начин и да направи простор пленарната седница за францускиот предлог да се одржи.

Потоа во текот на викендот министерот за надворешни работи, Бујар Османи, најверојатно ќе го потпише протоколот со Бугарија, за в понеделник Владата да ја извести Европската комисија дека ја прифатила рамката за преговорите. Ден подоцна, најверојатно во Брисел, ќе се одржи меѓувладината конфереција.

СДСМ е уценет од ДУИ?

Сепак, нашите извори откриваат дека не сите пратеници на СДСМ, како и барем еден од министрите, се уверени дека францускиот предлог е добар за Македонија. Иако не е прецизирана точната бројка на пратениците од СДСМ кои би биле воздржани или можеби би се изјасниле против предлогот, сепак од опозициските редови порачуваат дека во расправата во Собранието би можело да видиме и неколку интересни дискусии, како и отворени противења на претставниците на владејачката коалиција од собраниската говорница.

Дознаваме и дека претставниците на ДУИ ја условиле коалицијата со СДСМ, доколку од која било причина предлогот не биде навремено прифатен, тогаш нивните министри ќе излезат од Владата. Веројатно од тие причини и претседателот на ВМРО-ДПМНЕ, Христијан Мицкоски, денеска испрати предлог до владејачката партија, со кој се обврза дека ќе ја поддржи евентуалната малцинска влада, а воедно и ќе се откаже од барањето за предвремени избори, доколку францускиот предлог биде одбиен.

Павле Трајанов има свои предлог-заклучоци

Од помалите коалициски партнери на СДСМ, засега само од Демократски сојуз порачаа дека нема да го прифатат предлогот, доколку претходно не бидат прифатени нивните предлог-заклучоци.

– Ако нема поширок консензус за интегриран текст, во кој ќе бидат вметнати нашите предлог заклучоци, тогаш и ние нема да го поддржиме францускиот предлог – изјави за Плусинфо, Павле Трајанов.

Тој порача дека би било штетно мнозинството без поддршка од опозицијата самото да го прифати предлогот, бидејќи тоа би можело да доведе до зголемување на тензиите во нашата земја.