ВИКТОРИЈАС СИКРЕТ ГО ОДБИЛЕ БАРАЊЕТО НА МАНЕКЕНКАТА КОЈА ИМА РАК ДА УЧЕСТВУВА НА РЕВИЈАТА „Не сум најмладата, со нај облини или најспособната, но, јас сум силна, храбра и жива“
Поранешната манекенка на „Викторијас сикрет“, Бјанка Балти, вели дека компанијата го одбила нејзиното барање да оди на модна ревија за време на патешествието со ракот. Во неодамнешното писмо до компанијата 41-годишната манекенка пишува: „Не сум најмладата, со нај облини или најспособната. Но, јас сум силна, храбра и жива“.
Балти напиша:
– Не знам точно од каде ми дојде храброста, но го направив тоа. Единствените работи за кои жалиме во животот се шансите што не сме ги искористиле. Па се прашав себеси: „Што имам да изгубам?“ и се одлучив. Пребарав на LinkedIn за е-адреси и го испратив ова отворено писмо до секој што можев да го најдам во компанијата.
Балти објави целосен транскрипт од писмото, кое го адресираше до „тимот на Викторија Сикрет“.
– Во текот на изминатите неколку години, ја гледав прекрасната трансформација на вашиот бренд – вистинска посветеност на различноста и инклузијата – започнува писмото.
– Видов жени од секоја големина, етничка припадност, пол и возраст претставени во вашите кампањи и ревии. Кога ја видов најавата дека модната ревија на „Викторијас сикрет“ се враќа оваа година, почувствував нешто моќно: и јас треба да бидам таму.
Не сум најмладата, со нај облини или најспособната. Но, јас сум силна, храбра и жива – и сè уште сум проклето секси. Гордо ги носам моите лузни и со гордост ја мавтам мојата новоизрасната коса. Мене да ме има на таа писта не би било само исполнет личен сон; тоа би испратило порака до милиони жени: Животот продолжува и покрај неволјите. Не си помалку жена. Ти си целосна. Ти си секси. Ти си незапирлива. Јас сум жив доказ за тоа – додава таа.
Подоцна во својот есеј, Балти ја истакна различноста на модната ревија за 2024 година: „Две транс жени, три плус-сајз моќници – Ешли Греам, Палома Елсесер, Девин Гарсија – и возрасна група што се протегаше од 22-годишната Лила Мос до 56-годишната Карла Бруни.“
Потоа таа објасни зошто треба да биде вклучена оваа година:
– Не (само) затоа што сум убава, туку затоа што ги претставувам милионите жени кои имале, имаат или ќе имаат рак. Сакам да им покажам дека дијагнозата не е крај на убавината, самодовербата или сензуалноста. Дека лузните не го бришат тоа што сме. Дека животот по ракот сè уште може да биде смел, секси и исполнет.
Балти рече дека добила одговор од Victoria’s Secret, кои „љубезно“ го одбиле нејзиното барање, наведувајќи дека, наводно, шоуто веќе е целосно составено.
– И тоа е во ред – вели Балти во својот есеј.
– Го направив овој смел потег бидејќи откако се разболев, чувствував одговорност да им донесам надеж не само на жените со рак, туку и на сите што учат да живеат повторно по тешкотиите. Се обидов. Не се случи. Но, не се каам. Ракот ме научи дека животот е премногу краток за да не се обидуваш и дека обидот никогаш не те убива – додаде таа.
Балти сподели дека се подложила на превентивна мастектомија во 2022 година откако открила дека го носи генот BRCA1, мутација што значително го зголемува ризикот од рак на дојка. Две години подоцна ѝ бил дијагностициран рак на јајници.
Моделот прошета по пистата на Victoria’s Secret во 2005 година за нивната тогашна годишна модна ревија. Брендот ја откажа ревијата на неодредено време во 2019 година поради контроверзиите околу претставувањето и инклузивноста. Компанијата објави дека ја обновува ревијата во 2024 година, а најновиот настан на 15 октомври го означи нејзиното второ враќање.
Меѓу моделите оваа година беа играчот на WNBA, Ангел Рис, моделот Џасмин Тукс (која гордо го покажа својот стомак), олимписката гимнастичарка Суни Ли, супермоделите Греам и Џиџи Хадид и други.