ВИКЕНД ВО ЗНАК НА ТАНЦОТ Деца-танчери од целиот свет на сцената на Националната опера и балет

Во сабота, 8 ноември, сцената на Националната опера и балет ќе се претвори во мозаик од движења, бои, емоции и музика.

Таму ќе се случува седмото издание на Интернационалниот танцов натпревар „Стејџ 2025“,  настан со кој Скопје повторно ќе биде центар на талент, креативност и младешка енергија.

Цел ден, од 9 до 22 часот, на големата и малата сцена ќе настапат над 1600 деца и млади танчери од 12 држави, претставувајќи го својот танцов израз низ класичен и современ балет, џез, модерен, акробатски и шоу танц… Секој настап има своја приказна – различна, но силна, исполнета со страст, музика и љубов кон сцената.

„Стејџ“ не е само натпревар – туку е прослава на уметноста, детството и различноста. Преку танцот, децата од целиот свет учат да ја разберат и почитуваат културата, да создаваат пријателства и да ја негуваат љубовта кон сцената.

Со секое издание, СТЕЈЏ станува мост што ги поврзува младите генерации преку уметноста, промовирајќи ја Македонија како земја на култура, талент и инспирација.

– Овој наш традиционален настан е потсетник дека вистинската убавина е во креативноста, посветеноста и сплотеноста, а токму тоа е духот што СТЕЈЏ го носи веќе седум години – вели Тамара Ѓурчиновска, организатор и уметнички директор на натпреварот.

Хајлајт на вечерта ќе биде Гала настапот на најдобрите десет изведби (TOP 10), избрани од меѓународното стручно жири, талентираните танчери ќе ги добијат највисоките признанија и престижни награди.