(ВИДЕО) ПРИВЕДЕНИ ТРОЈЦА ОД МАКЕДОНИЈА ШТО СЕ БОРЕЛЕ ЗА ИСИС Ќе се гонат за служба во непријателска војска

Приведени се тројца македонски државјани кои во 2014 година се приклучиле на терористичката организација Исламска држава ИСИС и како борци активно учествувале во воените дејствија на територија на Сирија, соопшти Министерството за внатрешни работи (МВР).

Во изминатиот период, лицата О.С. (28), Р.С. (33) и М.Г. (26) биле предмет на интерес на безбедносните служби и во меѓународна соработка на МВР и АНБ со други партнерски безбедносни служби, активностите резултирале со истовремена синхронизирана полициска акција спроведена на територија на Република Северна Македонија и Франција, при што се лишени од слобода две лица во нашата држава и едно лице во Франција, а сите се државјани на Република Северна Македонија.

Постапувајќи по Наредби за претреси во дом и други простории издадени од Судија за претходна постапка, денеска, во утринските часови, МВР извршило претреси на две локации во Скопје кај О.С. и кај Р.С., кај кои се пронајдени и одземени огнено оружје, муниција, мобилни телефони и други електронски уреди кои можат да содржат дополнителни докази за извршеното кривично дело.

Согласно обезбедените докази, Секторот за борба против тероризам, насилен екстремизам и радикализам до Основно јавно обвинителство за гонење на организиран криминал и корупција денеска (12.05.2023) поднесе кривична пријава против наведените лица за сторено кривично дело „служба во непријателска војска“ предвидено во член 322 од Кривичен законик.