ВИ ГИ ПРЕДАДОВМЕ СКОРО ЗАВРШЕНИ, КАДЕ ВИ СЕ ГАСОВОДИТЕ? Азилантот Никола Груевски поставува незгодни прашања

Поранешниот премиер Никола Груевски е сѐ поактивен на Фејсбук и сега ја критикува Владата на „свој терен“, споредувајќи ги странските директни инвестиции и воопшто капиталните вложувања во негово време и сега.

„Постојат повеќе причини зошто во последните шест години нема многу нови гринфилд, странски директни инвестиции кои ги пронашла, им пристапила и со своја активност и свои луѓе и политики ги привлекла актуелната влада“, пишува Груевски, нагласувајќи дека тука не влегуваат оние компании „со кои ние ги бевме завршиле или привршиле преговорите, а инвестицијата се случи по нашето заминување од власт“.

Зборувајќи за отворањето на американската фабрика за електронски уреди „Кемет Електорникс“, Груевски пишува:

„Ништо не ни дојде ниту случајно, ниту без многу труд, работа и знаење. Во овој случај уште поголемо ни беше задоволството што се покажа дека нашата одлука да земјата се рекламира за инвестиции и за туризам на CNN international и на други меѓународни медиуми се покажа за многу исправен потег (за жал веќе од 2017 година е запрено), иако и ова беше силно критикувано како непотребно трошење пари од тогашната опозиција, а денешна власт“.

„Нѐ критикуваа, ама ние носевме инвестиции!“

„Не плукај по нешто со што утре можеби ќе бидеш горд со истото. Ќе ти биде непријатно“, напиша Груевски, потсетувајќи дека опозицијата во негово време го критикуваше начинот на кој беа привлекувани инвестиции, преку министри кои тој ги привлекол од дијаспората, со реално и одлично искуство во мултинационални компании.

„Ги критикуваа промените во законите кои ги направивме за да привлечеме повеќе инвестиции. Критикуваа и за тоа што во 34 града во светот пративме промотори за инвестиции кои секој ден тропаа на вратите на канцелариите на претседателите на компаниите за да им зборуваат за Македонија. Критикуваа што правевме роуд шоу низ повеќе држави и градови за преставување на потенцијалите и условите за инвестирање во Македонија. Критикуваа и за висината на почетните плати во тоа време, сме правеле робовладетелско општество и слично глупости, иако секојдневно објаснував дека политиката на големите корпорации е да тргнат со пониски плати и потоа постепено да ги зголемуваат“, пишува, меѓу другото, поранешниот премиер.

Ден претходно, Груевски потсети на жестоките критики од медиумите за изградбата на жичарницата во Скопје. Таа сега се користи, а граѓаните чекаат да се изгради втората фаза, која веќе е проектирана од едно слободно место во близина на болницата Козле па до средно Водно. И кулата за радиодифузните антени исто така на врвот на Водно, по смената на власта во мај 2017 година остана речиси недопрена.

„Енергетиката ли е приоритет? Зошто не ја завршите работата?“

„Некој ќе рече дека сега тоа не е приоритет. Во ред. Што е приоритет? Енергетиката? Гасоводот?“, прашува Груевски и потоа објаснува што се случува со гасоводната мрежа во земјава:

„Седма година откако го завршивме гасоводот од кумановско Клечовце до Штип, се уште не е ставен во употреба, не е изградена секундарна и терцијална мрежа која треба да се даде под концесија на искусен инвеститор и домовите, училиштата, институциите, канцелариите и фабриките во Штип и Св. Николе да добијат гас. Да нагласам дека за ова не треба никаква инвестиција од буџетот. Треба само тендер за концесионер кој ќе инвестира и стопанисува. Шест години тој тендер не го објавуваат“, напиша Груевски.

Речиси истото е и со гасоводот Штип – Неготино/Кавадарци. Шеста година како не е завршен гасоводот Скопје – Тетово – Гостивар, кој требаше да биде завршен до 2019 година. До таа година требаше да заврши и изградбата на гасоводот Неготино/Кавадарци – Прилеп – Битола. Доцни и тендерот за секундарна и терцијална гасификација за Скопје и во источна и во западна Македонија.

„Ако енергијата и гасот се приоритети, зошто сето ова досега не е завршено?“, прашува Груевски.

Тој потсетува дека неговата влада во 2016 година предвиде изградба на три нови гасни електрани, по една во Скопскиот, во Полошкиот и во Штипскиот регион, како и една помала во Клиничкиот центар „Мајка Тереза“. Со дополнителна инвестиција ТЕЦ Неготино требаше да стане гасна централа, исто како и ТЕЦ Осломеј.

„Зошто овие 4+2 гасни централи на наша територија се заменија со една на грчка територија е друго прашање“, пишува поранешниот премиер, додавајќи дека до 2022 година требаше да завршат проектите кои во 2016 година беа нарекувани „прва фаза на гасификацијата“.

„И знаете што е најголема трагедија? Тоа што во меѓувреме, 6 години додека не градеа гасоводи, автопати, брани, радиодифузната кула, зградите за факултетите кај Мавровка, пругата кон Бугарија и се друго што го запреа или го успорија, цените за градба толку многу се зголемија, што сега истото ќе ја чини државата дупло!“, анализира Груевски.