ВЕТИЛ ДЕКА ЌЕ ИМ ОТВОРИ ФИРМА ВО ДУБАИ, АМА ГИ ИЗМАМИЛ Албанец зел 11.000 евра од двајца тетовци
Измамите за вадење документи за работа во странство, дозволи или за друг тип услуги не се ретка појава на полошкото подрачје. Наивни граѓани им плаќаат по неколку илјади евра на измамници, а по извесно време сфаќаат дека се ограбени.
Жител на тетовско село (57), во четвртокот на 28 март во 14.40 часот, пријавил во СВР Тетово дека 58-годишниот М.М. од Република Албанија, во текот на минатиот месец, нему и на уште едно лице им ветил дека ќе им отвори фирма во Дубаи, а за возврат тие во три наврати му платиле вкупно 11.000 евра.
Но, фирмата не им била отворена, ниту, пак, им ги вратил парите, по што сфатиле дека се измамени, информира полицијата.
Од СВР Тетово апелираат на внимателност.
– Апелираме граѓаните особено да внимаваат кога стапуваат во контакт со непознати лица кои им нудат разни услуги или производи и доколку се посомневаат дека се жртви на измамници, да пријават на бесплатниот број 192 или во најблиската полициска станица – нагласува портпаролот на СВР Тетово, Марјан Јосифоски.
Годинава на тетовско-гостиварското подрачје се евидентирани околу 15 измами, од кои повеќето се целосно расветлени, а сторителите се откриени.
Последниот пријавен случај се расчистува и се документира.