ВЕНЕЦУЛА НЕ СЕ ПРЕДАВА, ДРЖАВАТА ФУНКЦИОНИРА И ЌЕ СЕ БРАНИ Министерот за надворешни работи вели дека народот е обединет и решителен

Министерот за надворешни работи на Венецуела, Иван Едуар Гил Пинто, изјави дека САД извршиле „подмолен и кукавички напад од грб“ во кој биле убиени цивили и воени професионалци, но дека народот на јужноамериканската земја бил обединет и мирен.

„САД воено ја нападнаа Венецуела за да ја скршат волјата на нејзиниот народ и да ја украдат нејзината нафта и други ресурси“, рече Гил во телефонско интервју од Каракас за шпанската национална радио станица РНЕ.

„Тоа беше подмолен и кукавички напад од грб во кој се убиени цивили и воени професионалци. Тоа убиство го изврши американската влада“, додаде тој.

Шефот на дипломатијата на Венецуела рече дека американскиот напад претставува јасно кршење на меѓународното право и Повелбата на Обединетите нации.

„Венецуелската армија е распоредена на терен, одлучна и гарантира безбедност на граѓаните. Ќе ја победиме секоја агресија“, истакна Гил.

Рече дека народот е „мирен и обединет“ и дека институциите функционираат и покрај „несразмерното бомбардирање“ што предизвика загуба на животи и материјална штета. Не го прецизираше бројот на убиени, додавајќи дека сè уште собираат информации за последиците од нападот.

Американскиот претседател Доналд Трамп објави дека венецуелскиот претседател Николас Мадуро е заробен и изнесен од земјата.

Гил од Каракас изјави дека Мадуро е легитимен претседател на Венецуела и дека земјата продолжува да функционира преку потпретседателката и парламентот, како што е пропишано со уставот.

„Тоа функционира совршено и го гарантира мирот“, заклучи дипломатот.