ВАНЧО МИХАЈЛОВ БЕШЕ СИНОНИМ ЗА САМОСТОЈНА МАКЕДОНИЈА Георгиевски вели лагите ги измислиле бугарските комунисти

Поранешниот премиер Љубчо Георгиевски вечерва во дебатниот магазин „Клик плус“ на ТВ21 истакна дека ВМРО е име кое прво Тодор Александров и Ванчо Михајлов го поставиле на меѓународната сцена.

– ВМРО е име кое прво Тодор Александров и Ванчо Михајлов го поставуваат на меѓународната сцена. Во времето на Гоце, на Даме, во времето на тие историски личности тоа е БМРО, ТМРО, значи внатрешно-македонска… но никогаш само ВМРО. Самото име е име на Тодор Александров и Ванчо Михајлов – посочи Георгиевски.

Тој истакна дека додека растел, Ванчо Михајлов бил синоним за самостојна и независна Македонија.

– Ние кога прифативме да го крстиме во Кичево – 10-ти Конгрес, значи ние прифативме свесно три конгреса на ВМРО на Ванчо Михајлов 24-та/25-та, 28-ма и 32-ра година. И сега јас не знам што не им е јасно на ВМРО-ДПМНЕ денешно, таа одлука не ни падна од небо – вели Георгиевски.

Тој рече дека сите лаги во македонската историографија се измислени од бугарските комунисти во борбата против Ванчо Михајлов.

– Мене ми е жал што во македонската историографија некои работи или едноставно немаме интерес или не сакаме да ги читаме. Сите тие лаги се измислени од бугарските комунисти во борбата против Ванчо Михајлов – вели Георгиевски.

Поранешниот премиер посочи дека прв креатор на договорот за соработка со соседна Бугарија бил претседателот Борис Трајковски, во времето кога бил заменик министер за надворешни работи.